Ўзбекистон Республикаси
Ҳуқуқни муҳофаза қилиш академияси
Қабул 
Ҳуқуқни муҳофаза қилиш академияси магистратурасига қабул қилиш учун номзодлар Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги (кейинги ўринларда — Агентлик) махсус электрон платформасида рўйхатдан ўтган ҳолда, тегишли ҳужжатларни Академиянинг махсус электрон платформаси орқали тақдим этишади.
Магистратурага ўқишга қабул қилиш учун номзодлардан қуйидаги ҳужжатлар талаб этилади:
шахсни тасдиқловчи ҳужжат (паспорт ёки ID карта) нусхаси;
олий маълумот тўғрисидаги диплом (иловаси билан) ёки дипломдан кўчирма (Ўзбекистон Республикаси олий таълим муассасаларини давлат гранти бўйича ўқиб тугатганлар учун);
ташқи номзодлар учун — чет тилини билиш даражасини тасдиқловчи В2 ва ундан юқори даражадаги миллий ёки халқаро сертификатларнинг электрон нусхаси (ички номзодлар учун мавжуд бўлганда);
ваколатли давлат органлари ходимлари учун — номзоднинг бевосита раҳбари томонидан имзоланган тавсиянома ва маълумотнома-объективка.
I. «Тергов фаолияти» мутахассислиги бўйича ўқишга кириш учун ҳужжатлар ҳар йили — 10 майдан 10 июнга қадар (шу куни ҳам) қабул қилинади.
Ушбу мутахассисликка қуйидаги шахслар танлов асосида қабул қилинадилар:
– Академиянинг «Тергов фаолияти» бакалавриат таълим йўналишини тамомлаган битирувчилари;
– Ваколатли давлат органларининг суриштирув ва тергов фаолиятини амалга оширувчи тузилмаларида ҳамда прокуратура органларида камида 3 йил хизматни ўтаган, «Юриспруденция» бакалавриат таълим йўналиши бўйича таянч олий юридик маълумотга эга амалдаги ходимлари (ҳарбий хизматчилари).
Магистратуранинг «тергов фаолияти» мутахассислиги бўйича таълимнинг кундузги шаклига ўқишга қабул қилинган ваколатли давлат органлари ходимлари, шунингдек, бошқа мутахассисликлар бўйича магистратуранинг кундузги шаклига ўқишга қабул қилинган прокуратура органлари ходимларининг эгаллаб турган лавозими ва ўртача ойлик иш ҳақи ўқиш даври мобайнида сақлаб қолинади.
Ушбу мутахассислик бўйича ўқишга қабул қилиш уч босқичда, яъни тест шаклида ўтказиладиган махсус психологик танлов, ёзма имтиҳон ва чет тилидан тест синови орқали амалга оширилади.
Имтиҳон саволлари ва вазифаларини тузишда қуйидаги талабларга алоҳида эътибор қаратилади:
а) психологик танлов бўйича:
психологик танлов номзодларнинг қуйидаги индивидуал-психологик хусусиятларини аниқлашга йўналтирилади:
ақл заковати, умумий интеллектуал салоҳияти;
мантиқий фикрлаши, зийраклиги, фикрлаш тезлиги ва таҳлил қилиш қобилиятлари;
б) мутахассислик фанлари бўйича:
номзодларда таҳлилий фикрлаш даражасини, ҳуқуқий манбалар билан мустақил ишлаш, шунингдек ҳуқуқий масалалар бўйича хулосаларни баён этиш қобилиятини аниқлашга қаратилиши;
тегишли фан ўқув дастурига, шунингдек тегишли соҳада қабул қилинган норматив-ҳуқуқий ҳужжатларга мувофиқлиги;
мамлакатда ўтказилаётган ислоҳотларнинг мақсад ва вазифаларини акс эттириши;
лўнда, оддий ва равон тилда баён этилиши;
фойдаланилган тушунча ва атамаларни турлича изоҳлаш имкониятини истисно этиши, шунингдек уларнинг қонун ҳужжатларида ва фанда қабул қилинган маъносига мувофиқ ягона шаклда қўлланилиши;
умумқабул қилинган грамматик, орфографик, пунктуация қоидаларига мувофиқ расмий тил услублари ва юридик терминологиядан фойдаланган ҳолда тузилиши;
в) чет тиллари бўйича:
номзодларнинг матн ва атамаларни тушуниш ҳамда улардан фойдалана олиш даражасини аниқлашга қаратилиши;
қисқа, аниқ ва тушунарли тил билан ифодаланиши ҳамда В2 даражасига мувофиқлиги;
умумқабул қилинган грамматик, орфографик ва пунктуация қоидаларига мувофиқлиги.
Миллий сертификат ёки халқаро сертификатларнинг қуйидаги даражаларига эга бўлган номзодларга чет тилидан имтиҳонларсиз максимал балл берилади.
II. «Киберхавфсизликни ҳуқуқий таъминлаш» мутахассислиги бўйича ўқишга кириш учун ҳужжатлар ҳар йили — 10 июндан 31 июлга қадар (шу куни ҳам) қабул қилинади.
Ушбу мутахассисликка қуйидаги шахслар танлов асосида қабул қилинадилар:
– «Юриспруденция» бакалавриат таълим йўналиши бўйича таянч олий юридик маълумотга эга шахслар (ташқи номзодлар);
– «Юриспруденция» бакалавриат таълим йўналиши бўйича таянч олий юридик маълумотга эга прокуратура органларининг ходимлари (шу жумладан, амалдаги кадрлар захирасидаги ходимлари), шунингдек, бошқа мутахассислик йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари (ички номзодлар);
– ваколатли давлат органларининг «Юриспруденция» бакалавриат таълим йўналиши бўйича таянч олий юридик маълумотга эга бўлган ходимлари.
«Киберхавфсизликни ҳуқуқий таъминлаш» мутахассислиги бўйича танлов ташқи номзодлар учун абитуриентнинг бакалавриат диплом балли ўртача кўрсаткичи ҳамда хорижий тилни билиш даражаси бўйича тегишли миллий ёки халқаро сертификат балли асосида баллар кетма-кетлигига қатъий риоя қилган ҳолда амалга оширилади ҳамда Агентлик томонидан «Информатика ва ахборот технологиялари» фанидан тест синовлари ўтказилади.
Бунда Рақамли технологиялар вазирлиги томонидан белгиланадиган нуфузли халқаро IT-сертификатига эга номзодлар «Информатика ва ахборот технологиялари» фани тест синовларидан озод қилинади ва уларга максимал балл берилади.
«Киберхавфсизликни ҳуқуқий таъминлаш» учун ваколатли давлат органлари ходимлари хорижий тилни билиш даражаси бўйича тегишли миллий ёки халқаро сертификат балли, агар улар бундай сертификатга эга бўлмаган тақдирда, чет тилидан Агентлик томонидан ўтказиладиган тест синовлари натижасида тўплаган балли, шунингдек, Агентлик томонидан ўтказиладиган «Информатика ва ахборот технологиялари» фанидан тест синовлари натижасида тўплаган балли ҳамда бакалавриат диплом балли ўртача кўрсаткичи асосида баллар кетма-кетлигига қатъий риоя қилган ҳолда ўқишга қабул қилинади.
Магистратуранинг «Киберхавфсизликни ҳуқуқий таъминлаш» мутахассислиги бўйича таълимнинг кундузги шаклига ўқишга қабул қилинган тингловчиларнинг охирги эгаллаб турган лавозими бўйича белгиланган тартиб ва миқдорда меҳнатга ҳақ тўлаш фонди тўловлари (пул таъминоти) сақланади.
«Информатика ва ахборот технологиялари» фанидан ўқув дастури
«Киберхавфсизликни ҳуқуқий таъминлаш» магистратураси учун халқаро IT-сертификатлар
III. «Коррупцияга қарши курашиш», «Инсон ҳуқуқларига оид ҳалқаро ҳуқуқ», «Прокурорлик фаолияти» (кундузги, кечки ва масофавий), мутахассисликлари бўйича ўқишга кириш учун ҳужжатлар ҳар йили — 10 июндан 31 июлга қадар (шу куни ҳам) қабул қилинади.
Ушбу мутахассисликларга қуйидаги шахслар танлов асосида қабул қилинадилар:
– «Юриспруденция» бакалавриат таълим йўналиши бўйича таянч олий юридик маълумотга эга шахслар (ташқи номзодлар);
– «Юриспруденция» бакалавриат таълим йўналиши бўйича таянч олий юридик маълумотга эга прокуратура органларининг ходимлари (шу жумладан, амалдаги кадрлар захирасидаги ходимлари), шунингдек бошқа мутахассислик йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари (ички номзодлар).
– ваколатли давлат органларининг «Юриспруденция» бакалавриат таълим йўналиши бўйича таянч олий юридик маълумотга эга бўлган ходимлари.
Танловда ташқи номзодлар учун абитуриентнинг бакалавриат диплом балли ўртача кўрсаткичи ҳамда хорижий тилни билиш даражаси бўйича тегишли миллий ёки халқаро сертификат балли асосида баллар кетма-кетлигига қатъий риоя қилган ҳолда амалга оширилади ҳамда қўшимча имтиҳон ўтказилмайди.
Шунингдек, мазкур мутахассисликлар учун ваколатли давлат органлари ходимлари хорижий тилни билиш даражаси бўйича тегишли миллий ёки халқаро сертификат балли, агар улар бундай сертификатга эга бўлмаган тақдирда, чет тилидан Агентлик томонидан ўтказиладиган тест синовлари натижасида тўплаган балли ҳамда бакалавриат диплом балли ўртача кўрсаткичи асосида баллар кетма-кетлигига қатъий риоя қилган ҳолда ўқишга қабул қилинади.
Магистратурага танлов ҳар йили фақат бир марта ўтказилади. Танловлар, қоида тариқасида, август ойида магистратурада ўқитиладиган тилда ўтказилади.
Вазирлар Маҳкамасининг 2023 йил 6 апрелдаги "Ўзбекистон Республикаси Ҳуқуқни муҳофаза қилиш академиясида олий таълим ва олий таълимдан кейинги таълимга қабул қилиш ва ўқитиш тартибини белгилаш чора-тадбирлари тўғрисида"ги 143-сонли қарори билан тасдиқланган Ўзбекистон Республикаси Ҳуқуқни муҳофаза қилиш академияси бакалавриатига ўқишга қабул қилиш ва ўқитишни ташкил этиш тартиби тўғрисида НИЗОМ.
Ўзбекистон Республикаси Ҳуқуқни муҳофаза қилиш академиясининг 2026/2027 ўқув йили учун магистратуранинг “70420301 - Тергов фаолияти” мутахассислиги бўйича ёзма имтиҳон саволлари