Академияда прокуратура органлари ходимлари давомийлиги 144 соатдан кам бўлмаган малака ошириш курсларида ўқитилади. Ўқув машғулотлари қонунчиликдаги янгиликлар мазмун-моҳиятини етказиш, касбий кўникма ва малакаларни такомиллаштириш, прокурор-тергов ишининг илғор ютуқларини ўргатиш, шунингдек, прокуратура органлари ходимлари фаолиятидаги тизимли камчиликларни бартараф этишга йўналтирилган.

Прокуратура органлари ходимлари малакасини оширишнинг даврийлиги ҳар уч йилда камида бир мартани ташкил этади.

Малака ошириш курслари прокуратура органлари ходимлари иш жойидан тўлиқ ёки қисман ажралган ҳолда кундузги шаклда, шунингдек, иш жойидан ажралмаган ҳолда масофавий (электрон on-line ёки off-line) таълим шаклларда ҳам ташкил этилади.

Академиянинг яна бир ноу-хауси малака ошириш дастурлари таълимнинг электрон ва анъанавий босқичларини ўзаро боғлиқликда қўллаш тизимини назарда тутувчи аралаш модел (blended learning) шаклига ўтказилганлигидир.

Академияда ҳуқуқбузарликлар профилактикаси, жиноятчилик ва коррупцияга қарши курашиш соҳасида ўзаро ҳамкорлик масалалари юзасидан давлат органлари ва бошқа ташкилотлар ходимлари ҳам малакасини оширади.

Яратилган моддий-техник база ҳамда рақамли ечимлар мажмуасининг жорий этилиши Академияда ўқув жараёнини ташкил этишга бўлган ёндашувларни мутлақо ўзгартириб, унинг миқдор ва сифат кўрсаткичларини тубдан яхшилаш имконини берди.

Хусусан, Академия ташкил этилганидан буён прокуратура, Департамент ва Мажбурий ижро бюроси органларининг 11 072 нафар (2018 й.–905, 2019 й.–3055, 2020 й.–2607, 2021 й.– 4314), шунингдек, бошқа ташкилот ва идораларнинг 6 107 нафар (2018 й.–2525, 2019 й.–1658, 2020 й.–1210, 2021 й.–714) ходимлари, жами 17 179 нафар ходимлар таҳсил олди.

Жойлардаги ходимларнинг эҳтиёжи ва сўровлари асосида малака ошириш имкониятини таъминлаш учун Академияда қайта алоқа механизмлари асосида ўқув курсларини ўзлаштиришнинг электив (танлов) модели қўллаб келинмоқда.

Мазкур мутлақо янги ёндашув малака ошириш фаолиятини индивидуал таълим траекторияси шаклида узлуксиз таъминлаш имконини яратди.

Малака ошириш курсларини муваффақиятли тамомлаган тингловчиларга сертификат берилади.