Ўзбекистон Республикаси Президентининг 08.05.2018 йилдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ-5438-сон Фармонига асосан Ўзбекистон Республикаси Бош прокуратураси Академияси 2019/2020 ўқув йилидан бошлаб магистратура мутахассисликлари бўйича кадрларни тайёрламоқда.

Магистратура мутахассисликлари бўйича кадрлар тайёрлаш ўқитишнинг амалий хусусиятига ва ҳуқуқни муҳофаза қилувчи органларининг касбий фаолияти билан узвий боғлиқликка таянган ҳолда амалга оширилади.

Академия магистратурасига абитуриентларни қабул қилиш тенг ҳуқуқлилик, қабул ва танловнинг ягона қоидалари асосида амалга оширилади.

Магистратурага қуйидаги шахслар танлов асосида қабул қилинадилар:

«Юриспруденция» таълим йўналиши бўйича таянч олий юридик маълумотга эга бўлган фуқаролар;

«Юриспруденция» таълим йўналиши бўйича таянч олий юридик маълумотга эга бўлган прокуратура органларининг ходимлари (шу жумладан, амалдаги кадрлар захирасидаги ходимлари), шунингдек бошқа таълим йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари.

Академия магистратурасининг “коррупцияга қарши курашиш”, “прокурорлик фаолияти” ва “тергов фаолияти” йўналишлари бўйича 2019/2020 ўқув йилига жами 30 та, шу жумладан 18 та давлат гранти ва 12 та тўлов контракти асосида қабул квотаси тасдиқланган бўлиб, шундан:

– прокуратура органлари ходимлари учун – 15 та (ҳар бир йўналиш бўйича 5 тадан);

– очиқ танлов бўйича – 15 та, шу жумладан давлат гранти асосида 3 та (ҳар бир йўналишда 1 тадан) ва тўлов контракти асосида 12 та.

“Ўзбекистон Республикаси Бош прокуратураси Академияси магистратурасига қабул қилиш ва ўқитишни ташкил этиш тартиби тўғрисида”ги Низомга мувофиқ, 2020/2021 ўқув йилига қабул квотаси Ўзбекистон Республикаси Бош прокуратураси ҳамда иқтисодиёт ва саноат вазирлиги томонидан тасдиқланади.

Очиқ танлов бўйича қабул қилинган абитуриентларга қонун ҳужжатларида белгиланган тартиб ва миқдорда ҳар ойлик стипендия тўланади.

Шунингдек, магистратурага ўқишга қабул қилинган прокуратура органлари ходимларининг эгаллаб турган лавозими ва ўртача ойлик иш ҳақи ўқиш даври мобайнида сақлаб қолинади.

Кириш имтиҳонлари ёзма имтиҳон ва суҳбат шаклида, қоида тариқасида, август ойида ўтказилади.

Ёзма имтиҳон мутахассислик фанлари ва чет тили бўйича ўтказилади.

Ёзма имтиҳон номзодларнинг мутахассислик фанлари бўйича таҳлил, ҳуқуқий манбалар билан мустақил ишлаш ҳамда ҳуқуқий масалалар бўйича хулосаларни баён этиш борасида қобилиятларини, шунингдек чет тилларини билишнинг тегишли даражасини аниқлашга қаратилган.

Миллий сертификат ёки халқаро сертификатларнинг тегишли даражаларига эга бўлган номзодларга чет тилидан имтиҳонларсиз максимал балл берилади.

Суҳбат номзодларнинг:

юриспруденция соҳасида профессионал билим даражаси ва кўникмаларини, хусусан назарий билим ва амалий кўникмаларини мустаҳкамлаш, ҳуқуқий манбалар билан ишлаш, норматив-ҳуқуқий ҳужжатларни шарҳлаш ва қўллаш, аниқ ҳуқуқий қарор қабул қилиш учун мавжуд далил ва ҳолатларни юридик жиҳатдан тўғри баҳолаш қобилиятини аниқлашга;

илмий-тадқиқот олиб бориш, хусусан таҳлил қилиш, фикрлаш, юриспруденцияга оид муаммоларни аниқлай олиш, илмий-тадқиқот фаолиятини олиб бориш, асосий илмий тушунчалар ва илмий-тадқиқот ишлари усулларини тушуниш қобилиятини баҳолашга;

салоҳият даражасини, хусусан муаммоларни ҳал қилишга ноанъанавий ёндашувни қўллаши, ўз устида ишлаши ва малакасини оширишга бўлган интилишини аниқлашга қаратилган.

Академия магистратурасида ўқиш муддати – 1 йил.

Бош прокуратура Академиясида магистратура йўналишлари бўйича таълим жараёни ўқитишнинг самарали замонавий педагогик ва ахборот коммуникация технологияларини қўллаган тарзда амалга оширилади.

Таълим жараёни етакчи хорижий таълим муассасалари амалиётида ўзини оқлаган қулай ва самарали усул – академик кредит тизими асосида олиб борилмоқда.

Академияда таълим жараёнининг асосини ўқитишнинг замонавий интерфаол шакл ва усулларини қўллаган ҳолда амалиётга йўналтирилган, компетенциявий ёндашув ташкил этади. Таълим сифатини баҳолаш мақсадида доимий мониторинг жорий этилади.

Академияда суд жараёни имитацияси, ҳодиса содир бўлган жойни кўздан кечириш ҳамда бошқа амалий машғулотларни ўтказиш имконини берувчи махсус ўқув хоналари жиҳозланган.

Тингловчиларда тергов ҳамда тезкор-қидирув фаолиятини ўтказиш бўйича махсус кўникмаларни шакллантириш мақсадида тизимли равишда вазиятли ўқув машғулотлари ташкил этилади.

Академия тил ўргатиш кафедраси томонидан инглиз тилини юридик мақсадларда чуқур ўргатиш йўлга қўйилган бўлиб, машғулотлар хорижий экспертларни жалб қилган ҳолда ўтказилади. Шунингдек, Академиядаги “Discussion club” доирасида жамиятдаги ҳуқуқий муаммоларни она тилиси инглиз тили бўлган хорижий экспертлар иштирокида муҳокама қилиш орқали тингловчиларда юридик инглиз тилини қўллаш кўникмалари мустаҳкамлаб келинмоқда.

Бош прокуратура Академияси дунёнинг 30 га яқин етакчи таълим ва илмий-тадқиқот муассасалари билан ҳамкорлик муносабатларини ўрнатган бўлиб, тингловчилар ўзаро алмашинуви дастурларини амалга ошириш юзасидан келишувларга эришилган. Унга кўра, магистратура тингловчилари хорижий давлатлар олий таълим муассасаларида стажировка ўтиш ва тажриба алмашиш имкониятига эга. Шунингдек, ўқув жараёнига Академия профессор-ўқитувчилари билан бир қаторда нуфузли хорижий таълим муассасалари экспертлари ҳамда профессор-ўқитувчилари жалб қилинади.

Ўқиш жараёнида ижобий натижаларга эришган Академия магистратураси битирувчилари прокуратура органларига хизматга қабул қилишга тавсия қилинадилар.

Академия магистрлари Академия докторантурасида ёки мустақил изланувчи сифатида илмий-тадқиқот фаолияти билан шуғулланиб, олий ўқув юртидан кейинги таълим олиш имкониятига эга бўладилар.

Қўшмча маълумотларни (71) 202-04-96 (1716, 1795) рақами орқали боғланган ҳолда олишингиз мумкин.