Мустақил изланувчиликка қабул жараёнлари якунланди

         Академияда юридик фанлар ихтисосликлари бўйича мустақил изланувчиликка қабул қилиш бўйича навбатдаги танловнинг якуний босқичи – талабгорлар билан суҳбат ниҳоясига етди.

      Навбатдаги танловда иштирок этган 27 нафар талабгордан 23 нафари ёки 85 фоизи прокуратура органларида фаолият кўрсатаётган амалиётчи ходимлар ва Бош прокуратура Академияси магистратураси битирувчилари ҳисобланади. Ушбу рақамлар прокуратура тизимидаги ходимларда илмий тадқиқот ишига қизиқиш ортиб бораётганлигини, қолаверса Бош прокуратура Академиясида илмий тадқиқотлар билан шуғулланиш учун зарур шарт-шароитлар яратилганлигидан далолат беради. Академияда юридик фаннинг барча ихтисосликлари бўйича ҳуқуқнинг долзарб муаммоларига бағишланган диссертацияларни амалга ошириш имконияти ҳам мавжуд.

       Қабул жараёнида Бош прокуратура Академияси, Инсон ҳуқуқлари бўйича Ўзбекистон Республикаси миллий маркази, Юристлар малакасини ошириш маркази, Ўзбекистон Республикаси жамоат хавфсизлиги университети етакчи олимлари иштирок этди.

   Саралаш икки босқичдан, яъни талабгорларнинг илмий тадқиқот олиб бориш кўникмаларини аниқлаш ва танланган мавзуларининг долзарблигини баҳолашдан иборат бўлди. Шунингдек, суҳбатда комиссия аъзолари томонидан суд-ҳуқуқ соҳасида мамлакатимизда амалга оширилаётган ислоҳотларнинг мазмун-моҳияти ҳақида ҳам саволлар берилди.

        Мустақил изланувчиликка қабул қилиш юзасидан навбатдаги танлов якуни бўйича тегишли қарор қабул қилинди.