“ЎЗБЕКИСТОН ПРОКУРАТУРАСИ: КЕЧА, БУГУН ВА ЭРТАГА” мавзусидаги халқаро илмий-амалий конференция якунлари ҳақида

2021 йил 16 декабрь куни Hyatt Regency Tashkent меҳмонхонаси анжуманлар залида Ўзбекистон Республикаси прокуратура органлари ташкил этилганлигининг 30 йиллигига бағишланган “Ўзбекистон прокуратураси: кеча, бугун ва эртага” мавзусидаги халқаро илмий-амалий конференция бўлиб ўтди.

Конференция Ўзбекистон Республикаси Бош прокуратураси томонидан Европада хавфсизлик ва ҳамкорлик ташкилотининг (ЕХҲТ) Ўзбекистондаги лойиҳалари Координатори офиси, БМТнинг Гиёҳвандлик ва жиноятчилик бўйича бошқармасининг (БМТ ГЖБ) Марказий Осиёдаги Минтақавий ваколатхонаси, «Минтақавий мулоқот» ХННТ ва бошқа халқаро ташкилотлар кўмагида ташкил этилди.

Тадбирнинг асосий мақсади прокуратура органларининг ўтган йиллардаги фаолияти таҳлили асосида истиқболдаги устувор вазифалар ва уларни самарали ижро этиш механизмларини миллий ҳамда хорижий олим ва экспертлар, соҳа ходимлари иштирокида муҳокама қилишдан иборат.

Конференцияда 30 дан ортиқ халқаро ташкилотлар, хусусан, БМТ агентликлари ва бошқа тузилмалари, ЕХҲТнинг Ўзбекистондаги лойиҳалари координатори, Халқаро прокурорлар ассоциацияси, МДҲ давлатлари Бош прокурорлари Мувофиқлаштирувчи кенгаши, Европа прокурорлари маслаҳат кенгаши ва бошқа бир қатор ташкилотлар, чет эл давлатларнинг Ўзбекистондаги элчихоналари, 30 га яқин хорижий давлатларнинг прокуратура органлари, ўқув ва илмий-тадқиқот муассасалари, Ўзбекистон Республикаси Президенти Администрацияси, Олий суди, Олий Мажлиси, суд ва ҳуқуқ-тартибот идоралар ҳамда ОАВ вакиллари иштирок этди.

Ўзбекистон Республикаси Бош прокурори Н.Йўлдошев тадбирни кириш сўзи билан очиб, Давлатимиз раҳбари томонидан асос солинган тараққиётимизнинг янги босқичида инсон ҳуқуқ ва эркинликларининг, давлат манфаатларининг том маънодаги ҳимоячисига, қонун устуворлиги ва адолат тантанасини таъминлашнинг муҳим воситасига айланиб бораётган прокуратура тизимининг узоқ йиллик тарихи, бугунги қизғин ҳамда кенг кўламли фаолиятининг ўзига хос ривожланиш босқичларига тўхталиб ўтди.

Бош прокурор тадбирда иштирок этаётган олимлар, экспертлар ва амалиётчилар, парламент аъзолари, шунингдек хорижий ҳамкорларни конференция кун тартибидан ўрин олган мавзулар юзасидан фаол ва конструктив мулоқот ҳамда фикр алмашишга чорлади.

Конференцияда Ўзбекистон Республикаси Олий Мажлиси Сенати Раисининг биринчи ўринбосари С.Сафоев, Халқаро прокурорлар ассоциацияси Президенти Чхоль-Кю Хван, МДҲ давлатларининг Бош прокурорлари Мувофиқлаштирувчи кенгаши Ижрочи котиби В.Зимин, Ўзбекистон Республикаси Олий суди раиси К.Камилов, Адлия вазири Р.Давлетов, Инсон ҳуқуқлари бўйича Миллий марказ директори А.Саидов сўзга чиқишди.

Тадбирда сўзга чиққан халқаро ташкилотлар вакиллари, хусусан ЕХҲТнинг Ўзбекистондаги лойиҳалари Координатори Элчи Пьер фон Аркс, БМТ ГЖБ Марказий Осиёдаги минтақавий ваколатхонаси дастури координатори К.Маркверинг, “Минтақавий мулоқот” ХННТ директори М.Север, БМТ Болалар жамғармаси (UNICEF) Ўзбекистондаги ваколатхонасининг раҳбари М.Мамедзаде, Ўзбекистондаги БМТ таълим, фан ва маданият ишлари бўйича ташкилоти (UNESCO) вакили А.Макаригакис иштирокчиларни Ўзбекистон Республикаси прокуратура органлари ташкил этилганлигининг 30 йиллиги муносабати билан муборакбод этиб, қонун устуворлигини таъминлаш йўлидаги фаолиятида ҳамкорликни давом эттиришишга тайёр эканликларини билдиришди.  

Сўнгра “Прокуратуранинг ташкилий-ҳуқуқий асослари ва фаолиятини ривожлантириш истиқболлари” мавзусидаги ялпи сессияда Бош прокурор ўринбосари Э.Юлдашев сўзга чиқиб, Ўзбекистон прокуратурасининг тарихи, бугуни ва ривожланиш истиқболлари борасида атрофлича тўхталиб ўтди.

Европа прокурорлари маслаҳат кенгаши Президенти, Испания Бош прокурорининг ўринбосари А.Ногуэра Испания прокуратурасининг ташкилий-ҳуқуқий ва институционал асослари бўйича маъруза қилди.

Бундан ташқари, Озарбайжон Республикаси Бош прокурори ўринбосари Э.Джамалов, Қирғизистон Республикаси Бош прокурори ўринбосари К.Токтакунов ва Россия Федерацияси Бош прокурори ўринбосари П.Городов ўз маърузаларида прокуратура фаолиятини ташкил қилиш ва амалга оширишнинг долзарб масалалари борасидаги тажриба билан ўртоқлашишди.

Конференция давомида шунингдек “Фуқароларнинг ҳуқуқ ва эркинликлари, жамият ва давлат манфаатлари ҳимоясини таъминлашда прокуратура органларининг роли” ҳамда “Прокуратура органларининг жиноятчиликка қарши курашиш фаолиятидаги ўрни” мавзуларида параллел сессиялар бўлиб ўтди.

Мазкур сессиялар доирасида БМТ ГЖБ эксперти, Уилфрид Лорье университети криминология кафедраси доценти, Онтарио (Канада) Адвокатлар палатаси адвокати Н.Ковалев, МДҲ давлатларининг Бош прокурорлари Мувофиқлаштирувчи кенгаши Ижрочи котиби В.Зимин, Украина Бош прокуратураси таркибидаги Коррупцияга қарши махсус прокуратура прокурори Е.Панченко, Португалия Давлат прокурори, Кибержиноятлар бўйича Конвенция Қўмитаси (T-CY) раисининг ўринбосари П.Вердело, Дьюссельдорф шаҳар прокуратураси Бош бошқармаси бошлиғи Г.Найфер (Германия), Сербия Республикаси Давлат прокурори ўринбосари Я.Станкович, Франция Миллий магистратура мактаби (ENM) халқаро ҳамкорлик бўлими бошлиғи Ф.Жилбер, Қозоғистон Республикаси Бош прокуратураси Халқаро ҳамкорлик департаменти бошлиғи Ғ.Койгелдиев ва бошқа қатор хорижий давлатларнинг прокуратура органлари, ўқув ва илмий-тадқиқот муассасалари вакиллари, шунингдек миллий мутахассислар ҳамда экспертлар маъруза қилишди.

Сессиялар доирасида кўриб чиқилган масалалар атрофида муҳокамалар бўлиб ўтди.

Конференция ишига жалб қилинган олимлар, тадқиқотчи ва амалиётчи ходимлар томонидан прокуратура органлари фаолиятини такомиллаштириш, шу жумладан “Прокуратура тўғрисида”ги қонуннинг янги таҳририни ишлаб чиқишда илғор хорижий тажрибани ҳамда халқаро мутахассисларнинг тавсияларини ўрганиб чиқиш давом эттирилади.

Шунингдек, халқаро илмий-амалий конференция якунига кўра илмий мақола ва тезислар тўплами нашр этилиши режалаштирилган.