БОШ ПРОКУРАТУРА АКАДЕМИЯСИ МАГИСТРАТУРАСИГА КИРИШ ИМТИҲОНЛАРИ ҲАҚИДА

Ўзбекистон Республикаси Бош прокуратураси Академияси магистратурасига 2020/2021 ўқув йили учун қабул жараёнларини ташкил этиш бўйича ишлар давом этмоқда.

Академияда магистратура мутахассисликлари бўйича кадрлар тайёрлаш ўқитишнинг амалий хусусиятига ва ҳуқуқни муҳофаза қилувчи органларининг касбий фаолияти билан узвий боғлиқликка таянган ҳолда амалга оширилади.

Академия магистратурасида жорий ўқув йилида таҳсил олиш учун жами 300 дан ортиқ номзодлар (шундан ташқи номзодлар – 153 нафар) ҳужжат топширган бўлиб, дастлабки босқичда ички номзодларнинг имтиҳонларда иштироки масаласи прокуратура органлари аттестация комиссияларида кўриб чиқилди, айрим мутахассисликлар бўйича битта ўринга номзодлар сони 10 нафардан ортиқни ташкил этади.

Кириш имтиҳонлари ёзма имтиҳон ва суҳбатдан ташкил топади. Ёзма имтиҳон ҳуқуқий мавзуда эссе ва чет тили бўйича тест саволларидан иборат.

Имтиҳонни ўтказишда очиқлик ва шаффофликни таъминлаш мақсадида:

– чет тили бўйича тест саволлари Давлат тест маркази томонидан тузилиб, марказ томонидан имтиҳон ўтказилади ва жавоблари баҳоланади;

– имтиҳон жараёни видеокузатув остида реал вақт режимида трансляция қилинади;

– ёзма имтиҳонга, имтиҳон жавобларини текширишга ва суҳбат бўйича комиссия фаолиятига бошқа идоралар вакиллари кузатувчилар ва мутахассислар сифатида жалб қилинади;

– имтиҳон билетлари автоматик тарзда электрон генерация қилинади;

– ҳар бир номзодга идентификацион рақам берилади ва имтиҳон жавоблари тўлиқ шифрланади.

Имтиҳон ўтказиладиган жойга киришдан олдин номзодларнинг тана ҳарорати ўлчаниб, ҳар бир номзод алоҳида тиббий қўлқоп ва ниқоб ҳамда сув билан таъминланади, уларга керакли канцелярия товарлари берилади.

Ёзма имтиҳон ўтказиладиган вақт ва жой. Чет тили бўйича имтиҳон ва ҳуқуқий мавзуда эссе 15-20 сентябрь кунлари оралиғида Тошкент шаҳри, Олмазор тумани, Келес йўли кўчасида жойлашган “Ғалаба” боғи ҳудудидаги ёпиқ саҳна майдонида ўтказилиши режалаштирилган. Имтиҳон соат 08.00 да бошланади. Номзодлар имтиҳон бошланишидан 30 дақиқа олдин имтиҳон ўтказиладиган жойга етиб келишлари шарт. Имтиҳон ўтказиш аниқ санаси ҳақида қўшимча равишда хабар берилади.

Кириш имтиҳонлари ўтказиладиган куни куннинг биринчи ярмида дастлаб чет тили бўйича, кейин эса мутахассислик фанлари бўйича имтиҳон ўтказилади.

Кириш имтиҳонларини топшириш учун номзодлар шахсини тасдиқловчи ҳужжатлар билан белгиланган вақт ва жойга келишлари лозим.

Белгиланган вақтдан кеч қолган номзодлар имтиҳонга киритилмайди, шунингдек келмаган номзодлар учун қўшимча имтиҳон ўтказилмайди ва бундай номзодларга тегишли имтиҳон учун “0” балл қўйилади.

Имтиҳон куни тана ҳарорати юқори бўлган номзодларнинг имтиҳонда иштироки масаласи тиббиёт ходимлари хулосасига биноан ҳал этилади.

Имтиҳон куни аудиторияга ўқув адабиёти, луғат, маълумотнома, жадвал, конспект, ёзув дафтари, қоғоз ёки электрон шаклдаги шпаргалкалар, норматив-ҳуқуқий ҳужжатлар, алоқа воситалари, аудио, фото ва видео ёзиш қурилмаларини олиб кириш ҳамда улардан фойдаланиш тақиқланиши маълум қилинади.

Чет тили бўйича ёзма имтиҳон 40 та саволдан иборат бўлиб, 2 қисмга бўлинади:

– 1-бўлим: Ўқиш (20 та савол), ҳар бир тўғри жавоб учун 1,5 балл берилади;

– 2-бўлим: Лексик ва грамматик компетенциялар (20 та савол), ҳар бир тўғри жавоб учун 1 балл берилади.

Тестни бажариш учун 1 соат 20 дақиқа, жавобларни жавоб варақасига кўчириш учун 10 дақиқа, жами 1 соат 30 дақиқа вақт ажратилади.

Миллий сертификат ёки халқаро сертификатларнинг қуйидаги даражаларига эга бўлган номзодларга чет тилидан имтиҳонларсиз максимал балл берилади:

инглиз тили учун – B2 ва ундан юқори даражадаги миллий сертификат ёки International English Language Testing System (IELTS 5.5), Test of English as a Foreign Language (TOEFL IBT 72), Cambridge Assessment English FCE халқаро имтиҳон тизимлари бўйича тилни билиш даражалари B2 ва ундан юқори;

немис тили учун – B2 ва ундан юқори даражадаги миллий сертификат ёки Goethe-Zertifikat, Deutsches Sprachdiplom (DSD), Test Deutsch als Fremdsprache (Test DAF) халқаро имтиҳон тизимлари бўйича тилни билиш даражалари B2 ва ундан юқори;

француз тили учун – B2 ва ундан юқори даражадаги миллий сертификат ёки Diplôme d'Etudes en Langue Française (DELF), Тest de Connaissance du Français (TCF) халқаро имтиҳон тизимлари бўйича тилни билиш даражалари B2 ва ундан юқори;

япон тили учун – B2 ва ундан юқори даражадаги миллий сертификат ёки Japanese Language Proficiency Test (JLPT № 2) халқаро имтиҳон тизимлари бўйича тилни билиш даражалари B2 ва ундан юқори;

бошқа тиллар учун – B2 ва ундан юқори даражадаги миллий сертификат ёки халқаро имтиҳон тизимлари бўйича тилни билиш даражалари B2 ва ундан юқори.

Ёзма имтиҳонда номзоддан ҳуқуқий мавзуда 1 та эссе ёзиш талаб этилади ва бунга 2 соат вақт ажратилади. Эссе жавоби 100 баллик тизимда баҳоланади.

Ёзма имтиҳон саволлари (эссе мавзулари) ҳамда суҳбат саволлари билетлари Бош прокуратура Академиясининг расмий веб-сайтида эълон қилинди.

Эссе натижаларига кўра 56 ва ундан юқори балл тўплаган номзодлар кириш имтиҳонларининг кейинги босқичи – суҳбатга киритилади.

Ёзма имтиҳон ва суҳбат натижаларидан норози бўлган номзодлар жавоблар Академия расмий веб-сайтида эълон қилинган кундан бошлаб икки иш куни давомида апелляция комиссиясига Академиянинг расмий электрон почтаси info@procademy.uz орқали шикоят бериш ҳуқуқига эга.

Шикоятлар апелляция комиссияси томонидан икки иш куни ичида кўриб чиқилади ва натижаси ҳақида номзоднинг электрон почтасига хабарнома юборилади.

Номзодлар кириш имтиҳонлари билан боғлиқ барча янгиликлар ҳақида Академиянинг расмий веб-сайти (www.proacademy.uz) ва ижтимоий тармоқлардаги расмий саҳифалари (https://t.me/ProsecutorAcademy, www.facebook.com/ProsecutorAcademy, www.instagram.com/proacademyuz) орқали танишиб боришлари мумкин.

Кириш имтиҳонларига оид қўшимча маълумот олмоқчи бўлган номзодлар учун ҳар куни онлайн консультациялар ўтказилмоқда. Бунинг учун улар 71-202-04-96 (ички 1775; 1795) телефон рақамларига мурожаат қилишлари мумкин.

Шуни ҳам айтиб ўтмоқчимизки, пандемия шароитида аҳолининг тўлов қобилияти пасайишини ҳисобга олиб, 2020/2021 ўқув йилида тўлов-контракт миқдори ўтган йилга нисбатан 10 фоизга пасайтирилди ва ҳозирда стипендиясиз тўлов-контракт миқдори 9.537.528 сўмни ташкил этади.

Бош прокуратура Академиясининг жамоаси номзодларга кириш имтиҳонлари давомида зарур шароитларни яратиб беришга қаратилган барча чораларни кўради ва уларга омад тилаб қолади.