“Юридик касбий таълимдаги инновациялар: мавжуд муаммо ва янги имкониятлар” мавзусида халқаро илмий-амалий конференция бўлиб ўтди

2022 йил 17 май куни Ўзбекистон Республикаси Бош прокуратураси Академияси ташкил топганининг 4 йиллигига бағишлаб “Юридик касбий таълимдаги инновациялар: мавжуд муаммо ва янги имкониятлар” мавзусида ташкил этилган халқаро илмий-амалий конференция бўлиб ўтди.

Анжуман гибрид шаклда ташкил этилиб, унда дунёнинг 20 дан ортиқ давлатларидан 30 дан зиёд халқаро ва хорижий ташкилотлар, илмий ва таълим муассасаларнинг раҳбарлари ва мутахассислари, шунингдек миллий экспертлар иштирок этди.

Конференция ялпи сессияси ишини Ўзбекистон Республикаси Бош прокурорининг ўринбосари С.Артикова ҳамда Олий Мажлис Қонунчилик палатаси Спикерининг биринчи ўринбосари, Инсон ҳуқуқлари бўйича Миллий марказ директори, академик А.Саидов кириш сўзи билан очиб бериб, Бош прокуратура Академиясининг ҳуқуқ соҳасида таълим ва илм-фанни ривожлантириш борасида эришаётган натижалари ва амалга ошириб келаётган мустаҳкам ҳамкорлик алоқаларини қайд этиб ўтишди.

Таъкидландики, ўган 4 йил давомида Академия томонидан кадрларни тайёрлаш, қайта тайёрлаш ва малакасини ошириш борасида 16 мингдан зиёд тингловчиларга анъанавий ва масофавий шаклларда таълим берилди.

Шунингдек, миллий таълим тизимида мавжуд бўлмаган “Коррупцияга қарши курашиш” ва “Инсон ҳуқуқларига оид халқаро ҳуқуқ” магистратура йўналишларининг очилиши ушбу долзарб соҳаларда мутахассислар тайёрлаш бўйича мавжуд бўшлиқни тўлдириб, бу борадаги илмий салоҳиятни мустаҳкамлашда муҳим аҳамият касб этиши таъкидлаб ўтилди.

Тадбирда сўзга чиққан халқаро ва хорижий ташкилотлар вакиллари, хусусан ЕХҲТнинг Ўзбекистондаги лойиҳалар Координатори в.б. Ханс-Ульрих Им, Германия халқаро ҳуқуқий ҳамкорлик фондининг Берлин бўлими раҳбари (IRZ) Ангела Шмайнк, “Минтақавий мулоқот” ХННТ (Словения) Ўзбекистондаги ваколатхонаси раҳбари Петра Горьюп юридик касбий таълимни ташкил этишдаги янги ёндашувлар, Академия билан бу борада амалга оширилаётган лойиҳалар ҳамда келгусидаги истиқболлар борасида фикр юритдилар.

Малайзия Коррупцияга қарши курашиш Академияси директори (MACA) Идрис бин Захарудин, Корея Йонгин шаҳри Адлия институти филиали президенти Шерл Оан Парк, Франция Миллий магистратура мактаби директори ўринбосари Самюэль Лэйне, Германия Одил судлов Академияси ректори Стефан Ягги, Хитой Миллий прокуратура мактаби профессори Го Синьян, М.В.Ломоносов номидаги Москва давлат университети профессори Тахир Базаров юридик соҳа ходимлари, хусусан прокурор-тергов ва суд соҳаси ходимлари учун қўшимча касбий таълимни ташкил этиш ва замонавий таҳдид ва талабларга мос тарзда самарали амалга ошириш, соҳада жорий этилаётган инновациялар борасида ўз тажрибаларидан келиб чиқиб фикр алмашдилар.

Куннинг иккинчи ярмида конференция доирасида шунингдек  “Юридик касб учун инсон ҳуқуқлари бўйича таълим” ҳамда “Юридик амалиёт ва таълимнинг рақамли трансформацияси” мавзуларида параллел сессиялар бўлиб ўтди. Фаол муҳокамалар давомида етакчи хорижий ва миллий экспертлар томонидан юридик касбий таълим, шу жумладан инсон инсон ҳуқуқлари бўйича таълим соҳасини инновацион ривожлантириш борасида масалалар ва мавжуд муаммолар атрофлича кўриб чиқилиб, янги имкониятлар ва устувор вазифалар белгилаб олинди.