Халқаро илмий-амалий конференциянинг “Юридик касб учун инсон ҳуқуқлари бўйича таълим” параллел сессиясининг натижалари

Бош прокуратура Академияси ташкил этилганлигининг 4 йиллиги муносабати билан ўтказилган халқаро илмий-амалий конференциянинг “Юридик касб учун инсон ҳуқуқлари бўйича таълим” мавзусидаги параллел сессияси халқаро экспертлар, хорижий ва миллий ташкилотлар, шу жумладан юридик кадрларни тайёрлаш, қайта тайёрлаш ва уларнинг малакасини оширишга масъул бўлган ҳамкор муассасалар вакиллари, етакчи олимлар ва илмий ходимлар иштирокида ўтказилди.

Параллел сессияда иштирок этган Инсон ҳуқуқлари бўйича Европа Кенгашининг маслаҳатчилари Ивана Руаня, Рафаэль Бустос, Қозон Федерал Университетининг декан ўринбосари Рустем Давлетгилдеев, Молдова Миллий юстиция институтининг директори Екатерина Попа юристлар, жумладан суд, прокуратура ва бошқа органлар ходимлари учун инсон ҳуқуқлари бўйича юридик таълимнинг ўзига хос жиҳатлари, ушбу йўналишда Италия, Испания, Молдова, Россия Федерациясида амалга ошираётган ишлар ҳақида батафсил ахборот бердилар.

Ўзбекистон Республикаси инсон ҳуқуқлари бўйича Миллий марказ директорининг биринчи ўринбосари, юридик фанлар доктори М.Тиллабаев инсон ҳуқуқларини ўқитишнинг долзарб масалалари хусусида тўхталиб, ҳозирда Ўзбекистонда инсон ҳуқуқлари соҳасидаги Жаҳон таълим дастурининг тўртинчи босқичини амалга ошириш жараёни ва бу босқичда белгиланган чора-тадбирлар ижросини қайд этиб ўтди. 

Ўзбекистон Республикаси Судьялар олий кенгаши ҳузуридаги Судьялар олий мактаби профессори, юридик фанлар доктори С.Рахманова ўз маърузасида Ўзбекистонда судьялар учун инсон ҳуқуқлари бўйича таълимда халқаро стандартларнинг ўрни ва аҳамияти ҳақида тўхталиб, ушбу йўналишда судьялар учун амалга оширилаётган ўқув дастури ва машғулотлари, тадқиқот ишларини гапириб ўтди.

Бош прокуратура Академияси профессори, юридик фанлар доктори Г.Маликованинг маърузасида Ўзбекистонда инсон ҳуқуқ ва эркинликлари соҳасида юридик таълимнинг шаклланиш ва ривожланиш тарихи чуқур таҳлил қилиб берилди.

Маърузалар бўйича ўтказилган муҳокама қизғин баҳс-муноазаралар шаклида ўтказилди.

Ўзбекистон Республикаси Олий Мажлиси Қонунчилик палатаси Спикерининг биринчи ўринбосари, академик А.Саидов муҳокамада юридик таълим соҳасидаги фанлар бўйича базавий дарсликларни ҳамда электрон маъруза матнларини тайёрлаш ишларига мамлакатнинг энг етук мутахассисларини жалб қилиш, юридик кадрларни тайёрловчи ўқув муассасаларининг бакалавриат ва магистратура йўналишлари хусусиятлари инобатга олинган ҳолда дарсликлар, қўлланмалар ва бошқа ўқув манбалари тайёрланиши лозимлиги ҳақида тўхталиб, Ўзбекистонда юридик таълимнинг ҳолати, муаммо ва истиқболларини мунтазам ўрганиб борилиши зарурлигини таъкидлади.

Муҳокамада иштирок этган юридик фанлар доктори, профессор, Ўзбекистонда хизмат кўрсатган юрист О.Оқюлов, Давлат ва ҳуқуқ институти вакиллари М.Турғунов, А.Тўлаганов, Судьялар олий мактаби кафедра бошлиғи С.Холбаев, Тошкент давлат юридик университети профессори Г.Юлдашева ва бошқалар кун тартибидаги масала бўйича киритган қатор таклифлар амалиётга жорий этиш учун умумлаштирилди.