Прокуратура органлари ходимларини касбий тайёрлаш ва малакасини ошириш соҳасидаги халқаро ҳамкорликни кенгайтириш

2022 йил 22 август куни Россия Федерацияси Бош прокуратураси ҳамда Қирғизистон Республикаси Бош прокуратураси делегацияларининг Ўзбекистон Республикаси Бош прокуратураси Академиясига ташрифи бўлиб ўтди.

Прокуратура органларига зиммасига юклатилган вазифаларни тўлақонли ва сифатли бажаришга қодир юқори малакали кадрларни тайёрлаш ва қайта тайёрлаш, уларнинг малакасини ошириш соҳасида ўзаро тажриба алмашиниш, бу борада ўзаро ҳамкорлик муносабатларини янада кенгайтириш мақсадида икки томонлама учрашувлар ташкил этилди.

Ҳамкорлар инновацион таълим технологиялари ва ахборот-коммуникация имкониятлариларини жорий этган ҳолда илм-фан, таълим ва амалиёт яхлитлигига асосланган замонавий илмий-таълим муҳитини яратиш борасидаги Академия тажрибаси билан танишдилар.

Шунингдек, меҳмонлар Академия томонидан махсус ишлаб чиқилган ахборот-таълим портали воситасида ходимларнинг ишдан ажралмаган ҳолда масофадан малака ошириш жараёнини, мультимедиа технологияларини қўллаган ҳолда сифатли ўқув материалларини ишлаб чиқиш имкониятини берувчи замонавий мультимедиа студияси фаолиятинм кўздан кечирдилар.

Тингловчилар назарий билимларини амалиётда қўллаш ва касбий компетенцияларини ривожлантиришга йўналтирилган махсус жиҳозланган ўқув хоналари: криминалистик полигон, киберполигон ва darknet лаборатория, суд мажлислари имитацияси хонаси, воқеа жойини кўздан кечириш тергов ҳаракатини амалга ошириш виртуал имитацияси мосламаси, электрон тир ва бошқа ўқув-амалий хоналар имкониятларида ҳамкорларда алоҳида қизиқиш уйғотди.

Куннинг иккинчи ярмида Академияда “Прокуратура органлари ходимларини касбий тайёрлаш ва малакасини оширишнинг долзарб масалалари” мавзусида халқаро давра суҳбати бўлиб ўтди.

Тадбирни кириш сўзи билан Ўзбекистон Республикаси Бош прокурори ўринбосари С.Артикова очиб берди. Россия Федерацияси Бош прокуратураси тизимида ягона кадрлар сиёсатини таъминлаш бошқармаси бошлиғи В.Власов, Россия Федерацияси Бош прокуратураси университети проректори – илмий-тадқиқот институти директори Р.Жубрин, Қирғизистон Республикаси Бош прокуратураси Прокурор-тергов ходимларини касбий тайёрлаш маркази директори А.Молдаханов, Россия ва Қирғизистон Бош прокуратуралари масъул ходимлари,  Ўзбекистон Республикаси Бош прокуратураси Академияси раҳбарияти ва ходимлари иштирок этдилар.

Тадбир иштирокчилари томонидан давра суҳбатида асосий эътибор юридик илм-фан ва таълимни ривожлантириш, кадрларни тайёрлашда замонавий технологияларни ва самарали методикаларни жорий этиш, ходимлар касбий комтенцияларини замонавий талаблар асосида такомиллаштириш ва бу борада профессор-ўқитувчилар салоҳиятини ошириш масалаларини муҳокама қилишга ҳамда бу борада ўзаро тажриба ва фикр алмашинувига қаратилди.

Халқаро давра суҳбатида Қирғизистон Республикаси Бош прокуратурасининг прокурор-тергов ходимларини касбий қайта тайёрлаш Маркази директори А.Молдобаев “Қирғизистон Республикасида олиб борилаётган янги кадрлар сиёсати шароитида прокуратура органлари ходимларини касбий тайёрлаш, қайта тайёрлаш ва малакасини ошириш” мавзусида, Россия Федерацияси прокуратураси Университети проректори – илмий-тадқиқот институти директори Р.Жубрин “Прокуратура органлари ва идораларининг кадрларини тайёрлашда Россия Федерацияси Прокуратура университетининг тутган ўрни” мавзусида маъруза қилди.

Бош прокуратура Академияси бошлиғи Е.Коленко Академиянинг ҳуқуқ соҳасида илм-фанни ривожлантириш борасида эришилган натижалари ва бу борадаги истиқболли вазифаларига тўхталиб ўтди.

Ташриф доирасида  шунингдек томонлар ўртасида кадрлар тайёрлаш ва илмий-тадқиқот фаолияти соҳаларида ўзаро англашув ва ҳамкорлик тўғрисида меморандумлар имзоланди.

Меморандумларнинг имзоланиши томонлар ўртасида таълим ва илмий-тадқиқот соҳаларида ўзаро манфаатли ҳамкорликни янада ривожлантиришга сезиларли туртки беради.

Профессор-ўқитувчиларнинг стажировкаларини ташкил этиш, тингловчилар учун академик мобиллик дастурларини ҳамда қўшма таълим дастурларини амалга ошириш таълим соҳасидаги ҳамкорликнинг устувор йўналишлари сифатида белгиланди.

Илмий-тадқиқот соҳасида қўшма илмий-тадқиқотлар олиб бориш, инсон ҳуқуқлари, кибержиноятчилик, одам савдоси, гиёҳванд моддалар савдоси, коррупция, жиноий фаолиятдан олинган даромадларни легаллаштириш ва бошқа масалалар бўйича илмий мақолалар тайёрлаш ва тадқиқот натижаларини нашр этиш, умумий илмий-ўқув лабораториялари ва марказларини яратиш, услубий материаллар, илмий ва ўқув адабиётлари алмашинуви назарда тутилган.