Жиноий активларни қайтаришнинг самарали механизмлари бўйича халқаро тренинг

Бош прокуратура Академияси Ғарбий ва Марказий Осиё давлатларининг активларни қайтариш бўйича идоралараро тармоғи (ARIN-WCA) Котибияти вазифасини амалга ошириши доирасида БМТнинг Гиёҳвандлик ва жиноятчилик бўйича бошқармаси ҳамда ЕХҲТнинг Ўзбекистондаги лойиҳалари Координатори билан ҳамкорликда мазкур тармоқ аъзо давлатлар вакиллари учун “Молиявий марказлар талаблари асосида ўзаро ҳуқуқий ёрдам кўрсатиш тўғрисидаги сўровларни тайёрлаш: Швейцария тажрибаси” мавзусида халқаро ўқув тренинги ташкиллаштирди.

Икки кунлик тадбир аралаш шаклда ўтказилиб, унда 10 та давлатдан 50 га яқин вакил иштирок этишди. Хусусан, тренингда иштирок этиш учун Грузия, Озарбайжон, Покистон, Қирғизистон, Туркманистон ва Эрон давлатларининг прокуратура, молиявий разведка, коррупцияга қарши курашиш ҳамда тергов органларининг масъул ходимлари Ўзбекистонга ташриф буюришди.

Швейцариялик халқаро эксперт Ж.Шмид ҳамда БМТ ГЖБ коррупцияга қарши кураш масалалари бўйича маслаҳатчиси В.Козин чет элдан жиноий активларни қайтаришнинг механизмлари ва ҳуқуқий асослари юзасидан ўз тақдимотларини амалга оширишиб, тренинг иштирокчилари билан мазкур соҳада ўзаро ҳуқуқий ёрдам кўрсатиш тўғрисидаги сўровларни тайёрлаш бўйича ўз билим ва тажрибаси билан алмашишди.

Тренинг давомида гуруҳларда амалий машғулотларни бажариш амалиётининг қўлланилганлиги иштирокчиларга жиноий активларни қайтариш соҳасида ўзларининг тажрибаси ва кўникмалари билан алмашиш имкониятини яратди ҳамда мазкур курснинг натижадорлигини оширишга хизмат қилди.