Академия вакиллари ҳукумат экспертлари сифатида БМТнинг Коррупцияга қарши конвенцияси қоидаларининг бажарилиши обзорида иштирок этдилар

Ўзбекистон Республикасида БМТнинг Коррупцияга қарши конвенцияси қоидаларини амалга оширишга қаратилган комплекс чора-тадбирлар амалга оширилмоқда.

Мазкур фаолият доирасида Бош прокуратура Академияси вакиллари ҳукумат экспертлари сифатида БМТнинг Коррупцияга қарши конвенцияси II ва V боблари қоидаларининг бажарилишини ўрганиш мақсадида Чили Республикасига мамлакат ташрифида иштирок этдилар.

Миссияда иккинчи кўриб чиқувчи давлат сифатида шунингдек Ямайка Бош прокуратураси ва Миллий ҳалоллик комиссияси экспертлари, Котибият сифатида эса БМТнинг Гиёҳвандлик ва жиноятчилик бўйича бошқармасининг Венадаги штаб-квартираси масъул ходимлари иштирок этишди.

Чили томонидан Президент маъмурияти, Бош назоратчи офиси, Бош прокуратура, Олий суд, Ошкоралик ва шаффофлик бўйича кенгаш, Давлат хизмати, ННТ, молия ва солиқ органлари, молиявий разведка тузилмалари ва бошқа муассасалар ходимлари иштирок этдилар.

Савол-жавоблар асосида ташкил этилган мулоқотда Конвенциянинг икки бобидаги коррупциянинг олдини олиш, шунингдек, мулкни қайтариш чора-тадбирларига оид нормалари моддама-модда муҳокама қилинди.

Муҳокамалар натижаси бўйича Чили тарафига кўриб чиқилаётган моддаларга тегишли норматив ҳужжатлар ёки кўчирмалар рўйхатидан иборат қўшимча саволлар рўйхати берилди.

Тақдим этилган маълумотларга асосланган ҳолда, Чилида коррупцияга қарши кураш соҳасида ижобий ислоҳотларни қайд этиш мумкин. Transparency International ташкилотининг Коррупцияни қабул қилиш ндекси ҳисоботига кўра, Чили сўнгги беш йил ичида 67 балл билан дунёда 27-ўринни, минтақада Уругвайдан кейин иккинчи ўринни эгаллаган.

2020 йилда Бош назоратчи офиси томонидан 16 мингдан ортиқ респондентни қамраб олган “Коррупцияга барҳам бериш” тадқиқоти ўтказилди. Мазкур ишнинг натижаси офис томонидан Коррупцияга қарши курашиш миллий стратегиясининг ишлаб чиқилиши ва қабул қилиниши бўлди.

Профилактика чоралари қаторида, мамлакатни 2011 йилдан буён 80 га яқин давлат ва минглаб ННТни қамраб олган, ҳукуматларни фуқаролар учун янада масъулиятли, инклюзив ва очиқроқ бўлишга чақирувчи “Open government” халқаро платформа ташаббусида иштирок этиб келаётганини қайд этишимиз мумкин.

Ушбу платформа доирасида фуқаролик жамияти, илмий доиралар ва халқаро ташкилотлар вакиллари иштирокида ишлаб чиқилган Чили ҳукуматининг 2020-2022 йилларга мўлжалланган Очиқлик бўйича 5- Ҳаракат режаси келтирилган. Ушбу режа ахборот ва очиқ маълумотлардан фойдаланиш, давлат харидлари ва шартномалар тузиш, очиқ одил судлов, очиқ парламент ва инсон ҳуқуқлари каби соҳаларни қамраб олган.

Лотин Америкаси ва Кариб ҳавзаси мамлакатларида Бош назоратчи идораси ва БМТТД томонидан қўллаб-қувватланган, ихтиёрий ташаббус бўйича давлат ва хусусий сектори, фуқаролик жамияти ташкилотлари ва илмий доиралар вакилларидан иборат 30 нафар аъзоси бўлган Коррупцияга қарши альянсни ташкил этиш тажрибаси ҳам муваффақиятли деб тан олинди.

Ҳуқуқни муҳофаза қилиш соҳасида миллий ва хорижий мансабдор шахсларга пора бериш ва жиноий фаолиятдан олинган даромадларни легаллаштириш билан боғлиқ ҳуқуқбузарликлар учун юридик шахсларнинг жиноий жавобгарлиги жорий этилгани, мамлакат бўйлаб коррупцияга оид ишларни тергов қилувчи махсус прокурорлар фаолияти йўлга қўйилгани, коррупцияга қарши ихтисослаштирилган прокуратурани ташкил этиш масаласи Стратегияга киритилганини алоҳида таъкидлаш мумкин.

Мамлакатда жиноий даромадларни яширишнинг олдини олиш ва уларни фош этиш самарадорлигини ошириш мақсадида юридик шахсларнинг бенефициар эгалари миллий реестрини юритиш тўғрисидаги қонун лойиҳаси тайёрланди.

Ташриф натижаси бўйича БМТнинг Коррупцияга қарши конвенцияси қоидаларини Чилида амалга ошириш бўйича якуний ҳисобот ва хулоса тайёрланади.