Электрон далилларни бошқа давлатлардан сўров асосида олиш масалаларига бағишланган миллий тренинг бошланди

Бош прокуратура Академиясининг Darknet лабораторияси негизида ЕХҲТнинг Ўзбекистондаги лойиҳалари координатори офиси билан ҳамкорликда БМТнинг Гиёҳвандлик ва жиноятчилик бўйича бошқармаси (БМТ ГЖБ) минтақавий ваколатхонаси кўмагида электрон далилларни бошқа давлатлардан сўров асосида олиш масалаларига бағишланган миллий тренинг бошланди.

Тренерлар тайёрлаш бўйича ушбу тренинг (ТоТ) ЕХҲТ Котибияти ҳузуридаги Трансмиллий таҳдидларга қарши курашиш департаментининг “Марказий Осиёда кибержиноятчиликка қарши курашиш салоҳиятини кучайтириш” лойиҳаси доирасида ЕХҲТнинг Ўзбекистондаги лойиҳалари координатори билан ҳамкорликда ташкил этилган.

Тренинг очилиш маросимида БМТ ГЖБнинг Марказий Осиёдаги минтақавий вакили Ашита Миттал, ЕХҲТнинг Ўзбекистондаги лойиҳалари координатори в.б. Ханс Ульрих Им ва Бош прокуратура Академияси раҳбари Е.В.Коленко сўзга чиқдилар.

Тренинг Бош прокуратура, Давлат хавфсизлик хизмати, Ички ишлар вазирлиги, Ахборот технологиялари ва коммуникацияларини ривожлантириш вазирлиги, Бош прокуратура, Давлат хавфсизлик хизмати ҳамда ИИВ Академиялари, “Киберхавфсизлик маркази” ДУК, Олий суд каби кибержиноятчилик ёки киберхавфсизлик билан шуғулланувчи давлат органлари вакиллари иштирокида 2022 йил 24 октябрдан 27 октябргача давом этади.

Тренинг дастури электрон далиллар бўйича сўров юбориш, ушбу жараёнда инсон ҳуқуқларига риоя қилиш, сўров юборишда юзага келадиган муаммолар, фавқулодда вазиятлар бўйича сўровлар, шунингдек, ўзаро ҳуқуқий ёрдамга оид масалаларни ўз ичига олади.

Тадбир дастури доирасида иштирокчиларининг эҳтимолий камчиликларини бартараф этиш, билим ва кўникмаларини институционализация қилиш мақсадида 2022 йил 28 октябрь куни тренинг якунлари бўйича қарорлар қабул қилиш ваколатига эга бўлган юқорида кўрсатилган органлар раҳбарияти вакиллари иштирокида давра суҳбати ўтказилиши режалаштирилган.

Бундан ташқари, давра суҳбати доирасида “Тик Ток” ижтимоий тармоғининг ҳудудий менежерининг иштироки ҳам режалаштирилган. Давра суҳбати иштирокчилари бошқа давлатларнинг хизмат кўрсатувчи провайдерларидан электрон далилларни сўров асосида олишнинг амалдаги тартибларини муҳокама қиладилар ва самарали миллий механизмларни яратиш бўйича тавсиялар ишлаб чиқадилар.