Коррупцияга қарши фаолият самарадорлигини ошириш масалалари бўйича халқаро давра суҳбати бўлиб ўтди

2022 йил 25 ноябрь куни Бош прокуратура Академиясида 9 декабрь – Халқаро коррупцияга қарши кураш кунига бағишланган Аксилкоррупция ҳафталиги доирасида Коррупцияга қарши курашиш агентлиги, “Юксалиш” умуммиллий ҳаракати, “Тараққиёт стратегияси” маркази, ЎзННТМА билан ҳамкорликда ҳамда БМТнинг Гиёҳвандлик ва жиноятчилик бўйича бошқармаси (БМТ ГЖБ)нинг Марказий Осиёдаги минтақавий ваколатхонаси  кўмагида “Коррупцияга қарши фаолият самарадорлигини оширишда амалий тадқиқотларнинг аҳамияти” мавзусидаги халқаро давра суҳбати ташкил этилди.

Давра суҳбатида миллий ва халқаро даражадаги академик доиралар, фуқаролик жамияти институтлари вакиллари, Бош прокуратура Академиясининг коррупцияга қарши курашиш соҳасида илмий тадқиқотларни олиб бораётган изланувчилари ва магистратура тингловчилари иштирок этди.

Аралаш форматда ташкил этилган тадбирда Ўзбекистоннинг барча ҳудудларида фаолият юритаётган нодавлат нотижорат ташкилотлари (ННТ), илмий ва таълим муассасалари вакилларининг иштирок этишига имконият яратилди.

Тадбир давомида академик доиралар, соҳа экспертлари ва миллий ННТлар ҳамкорликда коррупцияга қарши курашиш масалалари бўйича ўтказган тадқиқотларининг натижалари кўриб чиқилди, ушбу йўналишни ривожлантириш масалалари ҳамда самарали тадқиқотларни ўтказишга қаратилган таклифлар муҳокама қилиб олинди.

Тадбирда сўзга чиққан Иқтисодий ҳамкорлик ва тараққиёт ташкилотининг коррупцияга қарши курашиш соҳаси таҳлилчиси Ираклий Урушадзе, Руминия Экспертлар форуми лойиҳа раҳбари Септимус Парву ва Лунд университети (Швеция) профессори Рустам Ўринбоевлар коррупцияга қарши сиёсатини баҳолаш кўрсаткичларини ишлаб чиқиш, давлат харидларини мониторинг қилишда жамоат ташкилотлари ва илмий жамоатчиликнинг роли ҳамда коррупцияни ва унга қарши курашишни фанлараро ёндашув асосида ўрганиш масалалари бўйича тажриба билан таништиришди.

Иштирокчилар фуқаролик жамияти институтлари ва академик ҳамжамият ўртасида бундай тадбирларнинг ўтказилиши коррупцияга қарши курашиш соҳасидаги амалий тадқиқотларни ўтказишда замонавий методика, илмий тамойил ва ёндашувларни қўллаш, тадқиқот доирасида илмий асосланган хулосалар ҳамда самарали таклиф ва тавсиялар ишлаб чиқилишини таъминлашга хизмат қилишини алоҳида таъкидлаб ўтишди.