“Сунъий интеллект ва инсон ҳуқуқлари” мавзусидаги давра суҳбати

2023 йил 24 февраль куни Ҳуқуқни муҳофаза қилиш Академиясида Ўзбекистон Республикаси Президентининг “Ўзбекистон Республикасида инсон ҳуқуқлари соҳасидаги миллий таълим дастурини тасдиқлаш тўғрисида”ги қарори ижроси юзасидан ўтказилаётган “Инсон ҳуқуқлари ҳафталиги” доирасида “Сунъий интеллект ва инсон ҳуқуқлари” мавзусида давра суҳбати бўлиб ўтди.

Маълумки, сунъий интеллект технологиялари одамлар ҳаётини ва ҳукумат фаолиятини яхшилаш  учун кенг имкониятлар очиб беради. Сунъий интеллект тизимларининг кучи, кўлами ва тезлиги кўплаб соҳаларда, жумладан соғлиқни сақлаш, транспорт, таълим ва ҳуқуқда самарадорликни ошириши мумкин.

Бироқ, сунъий интеллект технологиялари инсон ҳуқуқлари, демократия ва қонун устуворлигига ҳам салбий таъсир кўрсатиши мумкин.

Сунъий интеллект бу – одамлар томонидан белгиланган мақсадларга эришиш учун ишлайдиган ва ишлаб чиқариладиган мураккаб технологияларнинг кенг доирасидир.

Давра суҳбатининг мақсади сунъий интеллектга эга тизимларни қўллашда инсон ҳуқуқлари соҳасидаги ҳуқуқий муаммолар ва уларнинг ечимларини ёритиб беришдан иборат.

Давра суҳбатида сунъий интеллектга эга тизимларнинг инсон ҳуқуқларига таъсири, сунъий интеллектдан фойдаланишнинг  оқибатлари, миллий ва Европа қонунчилигида сунъий интеллектни тартибга солиш ва такомиллаштириш масалалари кўриб чиқилди.

Тадбир давомида иштирокчилар ўзларини қизиқтирган саволларни бериш ва ушбу соҳа бўйича ҳалқаро эксперт Вестминстер университети профессори, доктор Алексей Гудковдан профессионал жавоб олиш имконига эга бўлдилар.