Жиноятчиликнинг олдини олиш бўйича Япония тажрибасини ўрганиш

Халқаро ҳамкорликни кенгайтириш ва Ҳуқуқни муҳофаза қилиш академиясининг илмий-тадқиқот салоҳиятини мустаҳкамлаш мақсадида Японияга Академия вакилларининг ташрифи ташкил этилди.

Тадбир 2019 йилда имзоланган ўзаро ҳамкорлик меморандуми доирасида, 2022 йил сентябрь ойида Япония делегациясининг  Академияга ташрифига жавобан, Япония Адлия вазирлигининг илмий-тадқиқот ва таълим институти (кейинги ўринларда – Институт) таклифига биноан ташкил этилди.

Япония томонидан тадбирларда Институт раҳбарияти ва масъул ходимлари, шунингдек Такушоку университети, Япония Адлия вазирлиги Тараққиёт институти таълим департаменти, Киото префектураси ва полиция бош бошқармаси терговни режалаштириш департаменти вакиллари иштирок этдилар.

Ташриф давомида Институт директори Тошинобу Уетоми билан учрашув ташкил этилди. Дастурга мувофиқ, гуруҳ раҳбари Е.Коленко маъруза қилиб, унда мамлакатимизда амалга оширилаётган иқтисодий ва суд-ҳуқуқ соҳаси ислоҳотлари тўғрисида маълумотлар тақдим этилди. Шунингдек, Япония томонига Ўзбекистон Республикаси Ҳуқуқни муҳофаза қилиш академиясининг тузилиши, вазифалари ва фаолиятининг асосий йўналишлари ҳақида тақдимот қилинди.

Шунингдек Ўзбекистон ва Японияда амалга оширилаётган суд-ҳуқуқ соҳасидаги ислоҳотлар тўғрисида мулоқот бўлиб ўтди, томонлар жиноятчиликка қарши курашиш ва жиноятларнинг олдини олишнинг миллий институционал асослари тўғрисида маълумот беришди.

Ташриф доирасида  Киото полицияси бошлиғи Хироки Цуцуи билан учрашув ташкил этилиб, унда  қабул қилувчи томон полициянинг асосий фаолияти ва техник жиҳозланиши тўғрисида маълумот берди. Бундан ташқари, Ўзбекистон делегацияси Киото туманларидан бирининг полиция участкаси қуйи бўғини (Кобан) иши билан танишди. Участканинг асосий фаолияти ушбу ҳудудда содир этилган ҳуқуқбузарликлар бўйича тезкор чоралар кўришга ҳамда ҳуқуқбузарликларни содир этган шахсларни аниқлаш ва уларни ушлаш бўйича ўз вақтида чоралар кўришга қаратилган.

Бундан ташқари, делегациялар иштирокчилари Япония Адлия вазирлигининг Тараққиёт департаменти ривожланиш ва тадқиқот институти вакили жаноб Е.Коджи билан учрашдилар. У Япониядаги жиноятчилик ҳолати тўғрисидаги статистик маълумотлар тўплаш бўйича ўтказиладиган тадқиқот методологиясини батафсил тушунтириб берди ва департамент томонидан йиллик нашр этиладиган “White Paper” жиноий статистика тўпламининг тақдимотини ўтказди. Ушбу тўплам ижтимоий-иқтисодий, демографик ва бошқа кўрсаткичлар нуқтаи назаридан криминоген вазиятни комплекс таҳлил қилишга имкон беради.

Томонлар шунингдек сунъий интеллектдан фойдаланиш орқали жиноий одил судловнинг келажаги, ҳуқуқни муҳофаза қилиш тизимида жиноятчиликнинг олдини олишнинг техник методологияси, жиноятчиликнинг олдини олиш тизими, расмий статистик ва ҳақиқий маълумотлар асосида жиноятчилик ҳолатини баҳолаш масалалари ва бошқа мавзуларда тажриба алмашдилар.