Ўзбекистон Республикаси Ҳуқуқни муҳофаза қилиш академияси лойиҳа бошқаруви соҳасида мутахассис вазифасига танлов эълон қилади (шартнома асосида вақтинчалик иш)

Академия ҳақида: Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сонли Фармонига асосан Бош прокуратура Академияси негизида Ўзбекистон Республикаси Ҳуқуқни муҳофаза қилиш академиясини ташкил этилди.

Қуйидагилар Академия фаолиятининг асосий йўналишлари этиб белгиланди:

таълим олувчиларда инсон ҳуқуқ ва эркинликларига сўзсиз риоя қилиш маданияти билан уйғунлашган юксак маънавий, психологик, таҳлилий ва касбий сифатларни ривожлантиришнинг самарали тизимини жорий этган ҳолда жиноятларни тергов қилиш соҳасида мутахассисларни чуқурлаштирилган мақсадли базавий тайёрлаш;

махсус касбий кўникмаларни шакллантириш ва ривожлантириш, суд-ҳуқуқ соҳасидаги ислоҳотларнинг мазмун-моҳиятини етказишга қаратилган дастурлар асосида тергов ҳамда ҳуқуқни муҳофаза қилиш фаолиятининг бошқа соҳаларида кадрларни тайёрлаш, қайта тайёрлаш ва уларнинг малакасини ошириш;

коррупцияга ҳамда жиноий даромадларни легаллаштиришга қарши курашиш соҳаларида махсус ўқув дастурлари асосида давлат органлари ва бошқа ташкилотлар ходимларининг малакасини ошириш ва қайта тайёрлаш тизимини йўлга қўйиш;

жиноятларни тергов қилиш методикаси ва тактикасини самарали белгилаш асосида жиноят ишлари бўйича мустақил иш юритиш кўникмаларини ривожлантиришга қаратилган интерфаол ўқитиш методларини таълим жараёнига татбиқ этиш;

ўқитишнинг замонавий шакллари, педагогик ва ахборот технологиялари асосида назарий тайёргарликнинг ҳуқуқни қўллаш амалиёти билан узвий боғлиқлигини, шу жумладан, масофавий таълим шаклида таъминлашга қаратилган ўқув жараёнини ташкил этиш;

прокуратура органлари ходимларида билим ва кўникмаларни, шу жумладан, тизимли таҳлил ва танқидий фикрлашни, қонунийликни таъминлаш юзасидан адолат ва масъулият каби юксак туйғуларни шакллантириш ва мустаҳкамлашга қаратилган тайёрлаш, қайта тайёрлаш ва малака оширишнинг яхлит тизимини ташкил этиш;

юқори малакали илмий-педагогик кадрларни тайёрлаш, ҳуқуқни муҳофаза қилиш фаолиятининг энг долзарб масалалари бўйича комплекс илмий тадқиқотларни тизимли асосда, шу жумладан, миллий ва халқаро грантларни жалб этган ҳолда амалга ошириш;

жиноятлар содир этилишининг сабаб ва шарт-шароитларини, шу жумладан, терговга қадар текширув ҳужжатлари ва жиноят ишларини ўрганиш асосида уларнинг алоҳида турлари кесимида таҳлил ва диагностика қилиш, шунингдек, ҳуқуқбузарликлар профилактикаси ва жиноятчиликка қарши курашиш фаолиятини услубий ва консультатив таъминлаш;

суд-ҳуқуқ соҳасида қўшма илмий тадқиқотлар олиб бориш, илғор педагогик тажриба алмашиш борасида узлуксиз халқаро ҳамкорликни амалга ошириш, ўқув жараёнига хорижий мамлак атлар етакчи олий таълим ва илмий-тадқиқот ташкилотларининг малакали мутахассисларини жалб қилиш.

Ҳозирги вақтда Академия фаолиятига вақтинчалик асосда лойиҳа бошаруви соҳасидаги мутахассисни жалб қилиш зарурати мавжуд. Мутахассис томонидан тақдим этилган ҳужжатлар маъқулланган тақдирда, у билан Академия ўртасида икки томонлама фуқаролик ҳуқуқий шартнома имзоланади.

Мутахассиснинг вазифалари:

Лойиҳа бошқаруви соҳасидаги мутахассис қуйидаги вазифаларни бажариши лозим:

Академия раҳбариятининг топшириғи бўйича академияда лойиҳалар билан ишлаш бўйича шартномага илова қилинган бажариладиган ишлар календарь-режасига мувофиқ, қуйидаги хизматларни (кейинги ўринларда – “хизматлар”) кўрсатиш;

– Академиянинг марказ, бошқарма, бўлим, кафедра, факультетлари (кейинги ўринларда – таркибий тузилмалари) иштирокида мавжуд янги лойиҳалар учун тегишли таклифларни ишлаб чиқиш;

– Академияда ишлаб чиқилиши режалаштирилаётган янги лойиҳалар ва улар бўйича таклифларни Академия таркибий тузилмалари билан муҳокама қилиш ва маъқуллаш учун Академия раҳбариятига киритиш;

– лойиҳа паспортини ишлаб чиқиш (SMART/SWOT таҳлил/мақсад) бўйича бир кунлик тренинг дастурини ишлаб чиқиш ва уни Академия ходимлари учун ўтказиш;

– Академиянинг манфаатдор таркибий тузилмалари учун базавий режаларсиз лойиҳа паспортларини ёзиб бериш;

– Академия ходимлари учун лойиҳаларни амалга ошириш бўйича ишларни бажаришнинг иерархик тузилмаси (ИСР) ва календарь режаларни тузиш бўйича қисқа муддатли тренинг ўтказиш;

– Академиянинг манфаатдор таркибий тузилмалари учун ишларни бажаришнинг иерархик тузилмаси ва календарь режаларни ишлаб чиқиш (консультациялар ўтказиш);

– Академия таркибий тузилмалари томонидан ишлаб чиқилган лойиҳалар тақдимотини ўтказиш.

Номзодга қўйиладиган талаблар:

Лойиҳа бошқаруви соҳасида тегишли ҳужжат (сертификат);

Лойиҳа бошқаруви соҳасида камида икки йиллик иш тажрибаси;

Ўзбек, инглиз, рус тилларини яхши билиш.

Бажариладиган иш муддати:

Мазкур иш муддати 2 (икки) ойга белгиланган бўлиб, келгусида заруратга кўра, фуқаро меҳнат шартномаси асосида Академияга ишга қабул қилиниши мумкин.

Тўлов миқдори:

Бажарилган иш учун тўлов миқдори тарафлар келишуви билан белгиланади ва талабгорга бажарилган иш натижасига кўра тўланади.

Талаблар: ташаббускорлик, жамоа билан ҳамнафас ишлаш, берилган топшириқларни ўз вақтида бажариш,

Иш вақти: Иш вақти 40 соатлик, ҳафтасига 5 кунлик иш режимини ташкил этади.

Талабгор Академия Кадрлар бўлимига фуқаролик паспорти ёки ID картаси билан шахсан мурожаат қилиб, тегишли ҳужжатлар (шахсини тасдиқловчи ҳужжат, объективка, олий таълим олганлик ҳақида диплом ва унинг иловаси, меҳнат дафтарчаси нусхаси, СТИР маълумотномасини тақдим этиши лозим. Тақдим этилган ҳужжатлар ўрганиб чиқилганидан сўнг заруратга кўра талабгор билан комиссия таркибида суҳбат ўтказилади.

Ҳужжатларни топшириш муддати 21.04.2023 йилга қадар.