“Юридик фан ва ҳуқуқни қўллаш амалиётининг долзарб муаммолари” мавзусидаги илмий-амалий конференция

Ўзбекистон Республикаси Ҳуқуқни муҳофаза қилиш академиясида “Юридик фан ва ҳуқуқни қўллаш амалиётининг долзарб муаммолари” мавзусидаги илмий-амалий конференция бўлиб ўтди.

Ҳар йили анъанавий ўтказиб келинаётган ушбу илмий-амалий конференция ишида Ўзбекистон Республикаси Ҳуқуқни муҳофаза қилиш академияси, Ўзбекистон Республикаси Судьялар олий кенгаши ҳузуридаги Судьялар олий мактаби, Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Ички ишлар вазирлиги академияси, Ўзбекистон Республикаси Жамоат хавфсизлиги университети, Тошкент давлат юридик университети ва бошқа олий таълим муассасаларининг профессор-ўқитувчилари, докторантлари, мустақил изланувчилари ва магистратура тингловчилари иштирок этдилар.

Мазкур тадбир Академия бошлиғининг ўринбосари, ю.ф.д., проф. М.Мамасиддиқовнинг кириш сўзи билан очиб берилди. Тажрибали профессор-ўқитувчилар билан бир қаторда маърузачилар сифатида ёш олимлар ҳам иштирок этиб, ўз илмий-тадқиқот мавзулари юзасидан маъруза қилдилар.

Хусусан, маърузачилар одил судловни таъминлашда тарафлар тортишуви принципи, жамиятда сиёсий барқарорликни таъминлашда инсон ҳуқуқларига риоя этилиши, Ўзбекистон Республикасида чет эл фуқаролари ва фуқаролиги бўлмаган шахсларнинг ҳуқуқ ва эркинликларини таъминлаш соҳасидаги муаммолар қолаверса, қийноққа қарши курашишга оид қонунчилик устидан прокурор назоратини ташкил этишда ҳамкорлик масалалари ҳамда глобаллашув жараёнида сунъий интеллектни қўллаш билан боғлиқ ҳуқуқий муаммолари юзасидан тақдимот қилдилар.

Ушбу конференцияда иштирокчилар ўтган даврда давлат-ҳуқуқий, фуқаролик-ҳуқуқий, жиноят-ҳуқуқий ва халқаро-ҳуқуқий фанлар бўйича эришилган ютуқлар ҳақида фикр алмашдилар, шунингдек билимлар иқтисодиёти шароитида интеллектуал мулкни тижоратлаштиришнинг ҳуқуқий жиҳатлари, мактабга қабул қилиш ва ўқув фаолиятини ташкил этишда коррупциявий омиллари муҳокама қилинди.

Тадбир якунида юридик фанни янада ривожлантиришнинг истиқболлари хусусида хулоса ва тавсиялар ишлаб чиқилди.