“Рақамли криминалистика ва криптоактивлар билан ишлаш асослари” мавзусида ўқув курси ўтказилди

Академия томонидан “Рақамли криминалистика ва криптоактивлар билан ишлаш асослари” мавзусида прокуратура терговчилари учун малака ошириш курси ўтказилди.

Курс давомида тингловчилар рақамли далиллар билан ишлаш, олиб қўйиш, жиноятларнинг рақамли изларини қайд этиш ва таҳлил қилиш тамойиллари бўйича назарий билим ва амалий кўникмаларга эга бўлдилар.

Тингловчилар замонавий билим олишлари учун курс дастуридан хорижлик мутахассисларнинг тақдимотлари ҳам ўрин олди. BIG Compliance Suite (Канада) вакиллари блокчейн тармоғида криптоактивларни ўтказиш изларини қидириш учун махсус платформа билан ишлаш бўйича маълумотларни тақдим этди. АҚШ Махфий хизмати мутахассиси кибержиноятларни тергов қилишнинг замонавий воситалари ва очиқ манбали разведка усуллари борасида тақдимот қилди.

Бундан ташқари, криптоактивлар билан ноқонуний операцияларни аниқлаш усулларини ўргатиш мақсадида Ўзбекистон Республикаси Истиқболли лойиҳалар миллий агентлиги мутахассислари томонидан тақдимот ва амалий машғулотлар ўтказилди.

Шунингдек, курсда рақамли криминалистика асослари, мобил, компьютер ва тармоқ криминалистикаси ҳақида маълумотлар берилди. Мобил қурилмаларга экспертиза тайинлаш учун махсус воситаларни қўллаш бўйича мисоллар келтирилди, шунингдек OSINT усулларига алоҳида эътибор қаратилди.

Дастур доирасида Тошкент шаҳар ИИББ Кибержиноятларга қарши курашиш бошқармасининг Рақамли криминалистика лабораториясига ташриф буюрилди.

Тренинг якунида махсус сертификатлар топширилди.