Активларни қайтариш бўйича идоралараро тармоқлар вакилларининг учрашувида иштирок этилди

Ҳуқуқни муҳофаза қилиш академияси ходимлари Ғарбий ва Марказий Осиё давлатларининг активларни қайтариш бўйича ноформал тармоғи (ARIN-WCA) Котибиятининг Европанинг CARIN тармоғи томонидан Гаага шаҳрида (Нидерландия) ташкиллаштирилган активларни қайтариш бўйича ноформал тармоқларнинг (ARIN) котибиятлари ва раислик қилувчи давлатлари вакилларининг учрашувида иштирок этди.

Европолнинг штаб-квартирасида ўтказилган мазкур учрашувда Европа (CARIN), Осиё ва Тинч океани (ARIN-AP), Кариб ҳавзаси (ARIN-CARIB), Шарқий Африка (ARIN-EA), Ғарбий Африка (ARIN-WA), Жанубий Африка (ARINSA), Лотин Америкаси (RRAG), Ғарбий ва Марказий Осиё (ARIN-WCA) минтақаларида ҳозирги кунда фаолият юритаётган тармоқларнинг котибиятлари ва раислик қилувчи давлатлари вакиллари, Европол, Еврокомиссия, ФАТФ, БМТнинг Наркотиклар ва жиноятчилик бўйича бошқармаси, GIZ фонди ҳамда АҚШ Адлия департаменти экспертлари қатнашишди.

Тадбир иштирокчилари активларни қайтариш бўйича ноформал тармоқларнинг ўрни ва аҳамиятини эътироф этиб, ушбу тармоқларнинг бошыа ташкилотлар билан, жумладан ФАТФ шаклидаги регионал ташкилотлар  билан ҳамкорлигини кенгайтириш унинг самарадорлигини янада оширишга хизмат қилишини алоҳида таъкидлашди.

Учрашув доирасида ARIN-WCA номидан, тармоқда жорий йилда раислик қилувчи давлат (Эрон) ҳамда тармоқнинг доимий Котибияти (Ҳуқуқни муҳофаза қилиш академияси) вакиллари томонидан ARIN-WCAнинг фаолияти, амалга оширилган ишлар ва истиқболли режалар юзасидан тақдимот қилинди.

Тадбир иштирокчиларида ARIN-WCA томонидан тармоққа аъзо давлатлар ўртасида маълумот алмашинувини таъминловчи ягона сўровнома намунаси катта қизиқиш уйғотди. ARIN тармоқлари вакиллари ARIN-WCAнинг ушбу ижобий тажрибасини ўрганиш ва тармоқ доирасида ҳам ушбу намунани  қўллаш кераклигини таклиф қилишди.

Шунигдек, ФАТФ – молиявий чораларни ишлаб чиқиш бўйича мақсадли гуруҳи томонидан ARIN тармоқ фаолиятига қизиқиш билдирилгани маъулм қилинди. Иштирокчилар томонидан мазкур ҳамкорлик ARIN фаолиятини янада сифатли қилишга ва жойлардаги ҳукуматлар ва ваколатли органлар билан ҳамкорликни мустаҳкамлашга ёрдам беришга хизмат қилиши таъкидланди.

Учрашув якунлари бўйича иштирокчилар томонидан келгусида муҳокама қилинадиган муҳим масалалар белгилаб олинди, фаол ҳамкорлик қилиш ва ARIN доирасида алоқаларни янада мустаҳкамлашга тайёр эканликлари билдирилди.