Илмий семинарнинг навбатдаги йиғилиши бўлиб ўтди

Ҳуқуқни муҳофаза қилиш Академияси ҳузуридаги юридик фанлар бўйича фан доктори (DSc) ва фалсафа доктори (PhD) илмий даражаларини берувчи DSc.31/31.12.2020.Yu.67.01 рақамли Илмий кенгаш қошидаги Илмий семинарнинг навбатдаги йиғилиши бўлиб ўтди.

Унда “Криминалистика ва суд экспертизаси кафедраси”га бириктирилган мустақил изланувчилар А.Имомназаровнинг “Кўздан кечириш тергов ҳаракатини такомиллаштиришнинг процессуал ва криминалистик жиҳатлари”, Л.Баракаевнинг “Далилларни тўплаш усули сифатида тафтиш ўтказишнинг процессуал ва криминалистик жиҳатлари” мавзуларидаги тадқиқот ишлари муҳокама қилинди.

Мустақил изланувчилар томонидан кўздан кечириш ва тафтиш институтларини ўтказишда амалиётда юзага келаётган муаммолар, уларни бартараф этиш йўллари, ушбу жараёнларда замонавий технологияларни қўллаш истиқболлари масалалари ёритилди. Шунингдек, рақамли маълумот ташувчи воситаларни, транспорт воситаларини кўздан кечириш, қўшимча ва қайта кўздан кечириш каби институтларни,  мутахассис далолатномасини далил манбаси сифатида Жиноят-процессуал кодексида акс эттириш,  тафтиш қарори устидан шикоят қилиш, тафтишчини сўроқ қилиш, ёлғон далолатнома берганлик учун жавобгарлик белгилаш тартибини жорий қилиш каби таклифлар илгари сурилди.

Тадқиқотчилар илмий ишлари ижобий баҳоланиб кейинги босқичга тавсия қилинди.