Прокуратура ва ички ишлар органларининг терговчилари учун малака ошириш курси ўтказилди

Академияда прокуратура органлари терговчилари ва ички ишлар органлари суриштирувчилари иштирокида “Қийноқларни тақиқлашга оид миллий қонунчилик ва халқаро стандартлар” мавзусида ўқув курси ўтказилди.

Курс дастури қийноққа қарши курашга оид халқаро стандартлар ва миллий қонунчилик таҳлили, қийноқ билан боғлиқ жиноят ишларини юритишда суриштирувчи, терговчи, прокурор ва суд жиноятнинг сабабларини ва унинг содир этилишига имкон берган шарт-шароитларни аниқлашлари шартлиги, қийноқ билан боғлиқ жиноятларни тергов қилиш тактикаси (Стамбул протоколи мисолида), жиноят процессида далиллар мақбуллигига оид нормалар: қийноқни тақиқланиши, ҳуқуқни муҳофаза қилиш органлари ходимларининг турли стрессоген вазиятларда психологик барқарорлигини таъминлаш имкониятлари, қийноқ билан боғлиқ жиноятларни фош этишда экспертиза имкониятлари, қийноқ билан боғлиқ жиноятлар юзасидан воқеа жойини кўздан кечириш ҳамда кечиктириб бўлмайдиган тергов ҳаракатларини ўтказиш, жиноятларни фош қилишда рақамли криминалистика имкониятлари, қийноқларни олдини олишда миллий превентив механизмларни ўрни каби долзарб масалаларни ўз ичига олган.

Ўқув курслари давомида жиноят процесси иштирокчиларини қийноқлардан муҳофаза қилиш ва уларнинг ҳуқуқларини таъминлаш энг авваломбор тергов органларининг вазифаси эканлиги қайд этилиб, жиноятларни фош этишда замонавий ахборот технологияларидан фойдаланиш, жиноятларни фош этишга оид илғор тажрибани ўрганиш, ходимларни доимий малакаларини ошириб боришлари муҳим эканлиги таъкидланди.