Дунёвий давлатда аждодлар маънавий меросига эътибор

2022-2026 йилларга мўлжалланган Ўзбекистоннинг тараққиёт стратегиясидаги бешинчи устувор йўналишида маънавий тараққиётни таъминлаш ва соҳани янги босқичга олиб чиқишга алоҳида эътибор қаратилди. Унда аҳоли ўртасида ҳуқуқий маданиятни шакллантириш бўйича ҳуқуқий-маърифий тадбирларни халқимизнинг бой тарихи, илмий маданий мероси, миллий диний қадриятларини ўргатиш билан уйғун ҳолда ташкил этиш белгиланган.

Мазкур стратегиянинг мазмунидан келиб чиққан ҳолда Ўзбекистон Республикаси Ҳуқуқни муҳофаза қилиш академиясида “Ислом фиқҳи ва замонавий ҳуқуқшунослик уйғунлиги” мавзусида давра суҳбати ўтказилди.

Давра суҳбатига юқори малакага эга бўлган ҳуқуқшунослар билан бир қаторда ўз соҳасининг етакчи мутахассислари, тарихчи, файласуф, сиёсатшунос, жамиятшунос, диншунос, исломшунос олимлар жалб қилинди.

Мазкур давра суҳбатида маърузачилар исломда гендер тенглигига муносабат, хотин-қизлар ҳуқуқ ва эркинликларини таъминлаш билан боғлиқ айрим масалалар, ислом фиқҳида суд ҳуқуқ тизими, фуқароларнинг ҳуқуқ ва эркинликларини ҳимоя қилиш, қонунлари ижросини назорат қилишнинг ўзига хос жиҳатлари ҳақида атрофлича маълумот бердилар.

Шунингдек, жамият сиёсий барқарорлигига дин ниқобидаги виртуал таҳдидларнинг таъсири, Шарқ мусулмон жамиятларининг замонавий дунёвий стандартларга муносабати мавзулари мутахассислар томонидан таҳлил этилди.

Тадбир ниҳоясида иштирокчилар ўз фикр-мулоҳазаларини билдилар, талабалар ўзларини қизиқтирган саволларга мутахассислар томонидан жавоб олдилар ҳамда иштирокчи мутахассисларга академия раҳбариятининг ташаккурномалари тақдим этилди.