Ўзбекистон Республикаси Ҳуқуқни муҳофаза қилиш академияси ташкил этилганининг бир йиллигига бағишланган халқаро илмий-амалий конференция якунланди

2023 йил 2 декабрь куни Самарқанд шаҳрида Ўзбекистон Республикаси Ҳуқуқни муҳофаза қилиш академияси ташкил этилганининг бир йиллиги муносабати билан “Ҳуқуқни муҳофаза қилиш соҳасида юридик таълим ва фан: замонавий тенденциялар ва истиқболлар” мавзусида халқаро конференция ўз ишини давом эттирди.

Конференциянинг мақсади таълим жараёнида инновацион ёндашувларни муҳокама қилиш, замонавий таҳдидларни инобатга олган ҳолда ҳуқуқни муҳофаза қилиш соҳаси кадрларини тайёрлаш борасида тажриба алмашиш, коррупцияга қарши курашиш, жиноий даромадларни легаллаштириш ва терроризмни молиялаштиришга қарши курашиш, шунингдек тергов фаолиятида инсон ҳуқуқларини таъминлаш соҳаларида халқаро стандартларни имплементация қилиш бўйича тавсиялар ишлаб чиқишдан иборат.

Тадбирда фан ва таълим соҳасидаги 40 дан ортиқ хорижий ва миллий экспертлар, 20 та мамлакатдан соҳавий муассасалар раҳбарлари ҳамда мутахассислари, шунингдек 10 дан ортиқ халқаро ташкилот вакиллари иштирок этишди.

Конференциянинг иккинчи куни доирасида "Ҳуқуқбузарликларнинг олдини олиш ва профилактика қилиш масалалари: илғор тажриба алмашиш ва ҳамкорлик истиқболлари" мавзусида тематик сессия бўлиб ўтди.

Сессияда Ўзбекистон Республикаси Ҳуқуқни муҳофаза қилиш академияси бошлиғининг биринчи ўринбосари Е.В.Коленко иштирокчиларга ҳуқуқни муҳофаза қилиш фаолияти муаммоларини ўрганиш бўйича олиб борилаётган изланишлар ва Академиянинг бу борадаги тажрибаси ҳақида маълумот берди.

Шунингдек, Лунд университети (Швеция) ҳуқуқ социологияси кафедраси профессори П.Олссон маҳаллий ҳамжамият даражасида жиноятчиликнинг олдини олиш ва ижтимоий-ҳуқуқий назорат масалалари ҳақида маъруза қилди.

Йўл ҳаракати хавфсизлиги бўйича ҳуқуқбузарликларнинг олдини олиш бўйича халқаро эксперт (Япония) Ф.Такаёши йўл ҳаракати хавфсизлигини таъминлашнинг долзарб масалалари билан таништирди.

Муҳокамалар давомида иштирокчилар сессия кун тартибидаги масалаларни муҳокама қилдилар ва келгусида экспертлар ҳамжамияти томонидан кўриб чиқилиши керак бўлган устувор масалаларни белгилаб олдилар.

Ўтказилган конференция натижаларига кўра, ҳуқуқни муҳофаза қилиш соҳасидаги илмий ва таълим салоҳиятини ошириш, масъул органлар фаолиятида инсон ҳуқуқларини таъминлаш, коррупцияга қарши стандартларни имплементация этиш, терроризмни молиялаштириш ва жиноий активларни тиклаш, идоралараро ва халқаро ҳамкорликни мустаҳкамлашга қаратилган амалий тавсиялари қабул қилинди.