Юридик фанлар соҳасидаги бир гуруҳ олимлар Божхона расмийлаштируви марказида бўлишди

Ўзбекистон Республикаси Ҳуқуқни муҳофаза қилиш академияси бошлиғи ўринбосари М.Мамасиддиқов бошчилигида Академиянинг бир гуруҳ профессор-ўқитувчилари Божхона қўмитасида бўлиб, жорий йилнинг 29 августида Давлатимиз раҳбарининг ташрифи чоғида ишга туширилган Божхона расмийлаштируви маркази фаолияти билан танишишди.

Шунингдек, Инсон ҳуқуқлари бўйича Ўзбекистон Республикаси Миллий маркази, Жамоат хавфсизлиги университети вакиллари ҳамда Санъаткорлар, ижодкор ва ижрочиларнинг муаллифлик ҳуқуқларини ҳимоя қилиш Палатаси раиси ҳам танишув жараёнларида иштирок этди.

Ўзбекистон Республикаси Президентининг “Божхона маъмуриятчилигини янада такомиллаштиришга доир қўшимча чора-тадбирлар тўғрисида” 2022 йил 27 апрелдаги ПФ–122-сон Фармонида соҳани рақамли трансформация қилиш, хизматлар сифати ва тезкорлигини оширишда муҳим рол ўйнамоқда.

Божхона расмийлаштируви марказида Маълумотларни қайта ишлаш маркази, Марказлаштирилган масофавий электрон декларациялаш пости, “Call-марказ”, Таргетлаш ва хавфларни мониторинг қилиш бошқармаси фаолият юритмоқда.

Божхона қўмитасида ташкил этилган муқобили йўқ яна бир марказ –  Таргетлаш ва хавфларни мониторинг қилиш бошқармасида эса Озарбайжон, Туркия, Қозоғистон, Қирғизистон, Туркманистон давлатларининг божхона хизматлари билан туну-кун ўзаро тезкор маълумот алмашинуви йўлга қўйилган.

Ўзбекистон ва Жаҳон божхона ташкилоти ўртасидаги фаол ҳамкорликнинг янги намунаси бўлган Марказий божхона лабораторияси ҳам меҳмонларда катта таассурот қолдирди.

Жаҳон божхона ташкилотининг Минтақавий божхона лабораторияси мақомини олган бундай лабораториялар дунё бўйлаб атиги 10 та давлатда бор, холос.

Олимлар божхона соҳасида қўлга киритилаётган ютуқ ва тажрибаларни фан билан умумлаштириш, тизимда хизмат қилаётган ходимларнинг амалий тажрибаларини илмий тадқиқотларга кенг жалб қилиш юзасидан ўз таклиф ва тавсияларини беришди.