Академияда Навоийхонлик кечаси ташкил этилди

Академияда ғазал мулкининг султони Алишер Навоийнинг 583 йиллиги муносабати билан маънавий ва илмий аҳамиятга эга Навоийхонлик кечаси ташкил этилди. Тадбирда навоийшунос олимларнинг иштирок этиши тадбирнинг илмий ва маънавий даражасини янада оширди.

Тадбир давомида Алишер Навоийнинг ҳаёти ва серқирра ижоди ҳақида батафсил ва чуқур маълумотлар берилди. Олимлар ва иштирокчилар томонидан Навоийнинг бетакрор ижодий мероси, унинг адабиёт ва маданиятимиз ривожига қўшган беқиёс ҳиссаси ҳақида сўзланди.

Шунингдек, тадбирда талабалар томонидан Алишер Навоийнинг ғазаллари тўпламидан танланган парчалар маҳорат билан ижро этилди. Бу ижролар тадбир иштирокчиларининг қалбларига чуқур таъсир қилди ва уларни Навоийнинг гўзал ва теран маъноли шеърияти билан янада яқиндан таништирди.

Тадбирнинг энг муҳим жиҳатларидан бири – фаол иштирок этган талабалар ва меҳмонларнинг муносиб тақдирланиши бўлди. Бу, ўз навбатида, талабаларни Алишер Навоий меросини ўрганиш ва унга ҳурмат билан қарашга ундайди ҳамда келажакда ҳам шу каби маънавий-маърифий тадбирларда фаол иштирок этишга рағбатлантиради.

"Навоийхонлик кечаси"нинг ташкил этилиши Алишер Навоийнинг бебаҳо ижодий меросини ёд этиш, уни кенгроқ ўрганиш ва ёш авлод қалбида улуғ шоирга бўлган муҳаббатни мустаҳкамлашда муҳим қадам бўлди. Бу тадбир нафақат илмий ва маънавий жиҳатдан бойитди, балки миллий маданиятимиз ва адабиётимизга бўлган ҳурмат ва муҳаббатни ҳам оширди.