Япония билан ҳамкорликни мустаҳкамлаш давом этмоқда

Бош прокуратура Академияси томонидан таълим жараёнига хорижий мутахассисларни жалб қилиш, ҳамкорликда илмий тадқиқотларни ўтказиш, норматив-ҳуқуқий, услубий ва таҳлилий характердаги ахборотлар билан алмашиш каби соҳаларда халқаро ҳамкорликни янада мустаҳкамлаш бўйича  қатор ишлар олиб борилмоқда. Хусусан, Академия Япониянинг ўқув-услубий ва тадқиқот муассасалари билан фаол ҳамкорликни амалга оширмоқда.

Мазкур ҳамкорлик доирасида жорий йилнинг 15 сентябрь куни Бош прокуратура Академиясида Оита (Япония) Технология миллий коллежи ва Васеда университети профессори Рикия Кубояманинг “Ҳуқуқий социология нуқтаи назаридан жиноятчиликни олдини олиш” мавзусидаги маърузаси ташкил этилди.

Тадбирда Бош прокуратура Академиясининг профессор-ўқитувчилар таркиби ва тингловчилари, Адлия вазирлиги ҳузуридаги юристлар малакасини ошириш маркази, Давлат хавфсизлиги хизмати институти, Ички ишлар Академияси ҳамда Тошкент Давлат юридик университети вакиллари иштирок этдилар.

Рикия Кубояма ўз маърузасида аҳолининг ҳуқуқий маданияти ва ҳуқуқий онги жиноятчиликнинг олдини олишда муҳим рол ўйнашини таъкидлаб ўтди. Профессор маъруза давомида Япония амалиётида қўлланилаётган, аҳолининг ҳуқуқий маданияти ва хабардорлик даражасини оширишнинг турли хил услублари ва йўллари ҳақида сўзлади. Шунингдек, мазкур соҳада мавжуд ҳуқуқий нормалар ва анъаналарга нисбатан аҳолининг муносабатларини ўрганиш муҳимлиги қайд этилди. Профессор томонидан жиноятчиликнинг олдини олишда ҳуқуқий социологиянинг ролини ўрганиш борасида ўтказилган тадқиқот натижалари намойиш қилинди. Шу билан бирга, Рикия Кубояма ҳуқуқий таълимнинг муҳимлигини таъкидлаб, аҳоли ҳуқуқий онги даражаси юридик кадрларнинг касбий маҳоратига бевосита боғлиқлигини айтиб ўтди.

Тадбир иштирокчилари профессор Рикия Кубояманинг тадқиқот ишига ўз қизиқишларини билдирдилар ва мазкур масаланинг долзарблиги атрофлича муҳокама қилинди. Муҳокама давомида  иштирокчилар жиноятчиликнинг олдини олишда институтларнинг, хусусан маҳалла ва мактабларнинг роли муҳимлигини алоҳида таъкидлашди.