Кибержиноятларни тергов қилиш бўйича халқаро тренингда иштирок этилди

Ўзбекистон Республикаси Ҳуқуқни муҳофаза қилиш академияси вакиллари халқаро эксперт ва тренерлар сифатида Бирлашган Миллатлар Ташкилотининг Гиёҳвандлик ва жиноятчилик бўйича (UNODC) бошқармасининг Олматидаги лойиҳалар офиси ва Марказий Осиё минтақавий мувофиқлаштирувчи ахборот маркази ҳамколрлигида ташкил этилган “Кибержиноятларни тергов қилиш: илғор тажриба, муаммолар ва минтақалараро ҳамкорлик” мавзусидаги тренингда иштирок этдилар.

Тренинг ишида шунингдек Ўзбекистон Республикаси Истиқболли лойиҳалар миллий агентлиги, Грузия Республикаси Бош прокуратураси, шунингдек, UNODC кибержиноятчилик бўйича Қатарлик эксперти иштирок этишди.

Тренинг иштирокчилари киберхавфсизлик ва рақамли далиллар билан боғлиқ асосий тушунчалар билан танишдилар. Улар жиноят содир этилган жойда, Интернетда ва онлайн тарзда рақамли далилларнинг манбаларини қандай аниқлаш ва олиб қўйиш кераклигини ўрганишди.

Тадбир дастури шунингдек киберхавфсизлик соҳасидаги замонавий тенденциялар, жумладан, даркнетда содир этиладиган жиноятларни аниқлаш ва тергов қилишнинг ўзига хос жиҳатлари, электрон далиллар ва уларнинг қабул қилиниши, крипто-активлар моҳияти, излаш ва крипто-ҳамённи тиклаш масалалари, Open Source Intelligence (OSINT) ва унинг кибержиноятларни тергов қилишдаги роли каби масалаларни қамраб олган.

Кибержиноятларни тергов қилишда ҳуқуқни муҳофаза қилиш органлари, ҳуқуқ-тартибот идоралари ва марказий органлар ўртасида кибержиноятчилик таҳдидларига қарши самарали курашиш учун халқаро ҳамкорликни мувофиқлаштириш ва ҳамкорлик қилиш заруратига алоҳида эътибор қаратилди.

Амалий машғулотлар давомида иштирокчиларга номларни таниш (NER), табиий тилни қайта ишлаш (NLP) ва компьютер кўришини ҳуқуқни муҳофаза қилувчи органлар фаолиятида қўллаш, шунингдек сунъий интеллект, OSINT ва SOCMINT воситалари ёрдамида гумон қилинувчиларни аниқлаш, OSINT (Open Source Intelligence – очиқ манбаларга асосланган текширув) воситалари билан ишлаш, миллий, минтақавий ва халқаро даражаларда ҳамкорлик қилиш кўникмаларига эга бўлиш имконини берди.

 “Darknet”да маълумотларини қидириш ва тадқиқ қилиш мавзуси тингловчиларда алоҳида қизиқиш уйғотди.

Тренингдан сўнг олинган билимларни қўллаш бўйича тавсиялар берилди. Қатнашчилар шунга ўхшаш тадбирларни мунтазам равишда ва кенгроқ шаклда ўтказиб туришни таклиф қилишди.