Хитой Миллий прокуратура институти делегациясининг ташрифи

Ўзбекистон Республикаси Ҳуқуқни муҳофаза қилиш академияси таклифига биноан Хитой Халқ Республикаси Миллий прокуратура институти президенти Сун Цинь бошчилигидаги делегация Ўзбекистонга ташриф буюрди.

Ташриф мақсади – ўзаро ҳамкорлик масалаларини муҳокама қилиш ва мустаҳкамлаш, прокуратура органлари ва Ҳуқуқни муҳофаза қилиш академияси фаолияти билан яқиндан танишиш ҳисобланади.

Ташриф давомида Хитой делегацияси вакиллари билан Бош прокуратура ва Академия раҳбарияти ўртасида ўтказилган учрашувларда ўзаро ҳамкорлик аҳволи муҳокама қилиниб, тарафлар икки томонлама ҳамкорликни кенгайтиришнинг устувор йўналишлари бўйича навбатдаги қадамларни белгилаб олдилар.

Хусусан, 2023 йилда Ўзбекистон ва Хитой прокуратуралари ўртасида 2024–2025 йилларга мўлжалланган Ҳамкорлик дастури, 2017 йилда иккала давлат прокуратура идоралари кадрларни тайёрлаш муассасалари ўртасида ўзаро англашув Меморандуми имзоланганлиги мамнуният билан қайд этиб ўтилди. Учрашувда мазкур ташриф Ўзбекистон ва Хитой прокуратура органлари ўртасидаги ҳамкорликни сифат жиҳатидан янги босқичга кўтаришга хизмат қилишига ҳамда қўшма тадбирлар орқали унинг амалий фаоллашувига туртки бўлишига ишонч билдирилди.

Икки томонлама мулоқотда прокурор кадрлар салоҳиятини ошириш йўналишида Хитойнинг бой тажрибасини ўрганиш ва ўзаро тажриба алмашиш, идоралараро ҳамкорликни янада мустаҳкамлаш масалалари кўриб чиқилди.

Ташриф доирасида Ҳуқуқни муҳофаза қилиш академияси ва Хитой Миллий прокуратура институти ўртасида ҳамкорлик тўғрисида англашув меморандуми имзоланди. Мазкур ҳужжат Академия билан Хитой Миллий прокуратура институти ўртасидаги ўзаро ҳамкорликни янада кенгайтириш ва мустаҳкамлаш ҳамда янги поғонага олиб чиқишга қаратилганлиги қайд этиб ўтилди.

Маълумот учун: Хитой Миллий прокуратура институти 1991 йилда ташкил этилган бўлиб, прокурор кадрларни тайёрлаш бўйича ягона таълим муассасаси ҳисобланади. Институтнинг мамлакат бўйлаб 30 та филиали, 72 та амалий ўқитиш базаси мавжуд. Институт томонидан 3 та нашр (газета, журнал ва тўплам) чоп этиб келинади. Институт дунёнинг 30 та мамлакатидаги ўқув ва илмий муассасалар билан ҳамкорлик ўрнатилган. 200 дан ортиқ хорижий ва миллий экспертлар таълим фаолиятига жалб этилган. Институтда прокуратура фаолит йўналишлари бўйича 5 та кафедра фаолият юритиб, ҳар йили 10 мингдан ортиқ тингловчилар малака ошириб келади.

Меҳмонлар Aкадемия фаолиятининг асосий йўналишлари, амалиётга йўналтирилган ёндашув ҳамда инновацион технологиялар асосида прокуратура-тергов соҳаси ходимларини тайёрлаш, қайта тайёрлаш ва малакасини ошириш жараёнини ташкил этиш, илмий-тадқиқот ва таҳлилий фаолият, шунингдек, Академияда яратиб келинаётган замонавий инфраструктура, шу жумладан, суд-тиббий экспертиза лабораторияси, криминалистик полигонлар, киберлаборатория ва бошқа махсус ўқув хоналари имкониятлари билан яқиндан танишдилар.

Шунингдек, Хитойлик профессорлар Академия тингловчилари учун атроф-муҳитни муҳофаза қилишда жамоат манфаатлари учун прокурорлар томонидан даъво киритиш, экологик жиноятларни фош этиш ҳамда инсон ҳуқуқларини ҳимоя қилиш бўйича Хитой прокуратурасининг тажрибаси ва роли масалалари бўйича маъруза қилдилар. Иштирокчилар атроф-муҳитни муҳофаза қилиш бўйича Хитой прокуратурасининг роли ва тажрибасини юқори баҳолаш баробарида мазкур соҳада сўнгги йилларда амалга оширилаётган ислоҳотлар ҳамда миллий тажриба бўйича ҳам фикр алмашиндилар.

Ташриф доирасида делегация вакиллари Тошкент шаҳри, Олмазор тумани ва Самарқанд вилояти прокуратуралари фаолияти билан яқиндан танишиб чиқдилар.

Шунингдек меҳмонлар Ўзбекистон прокуратураси тарихи музейи, Тошкент ва Самарқанд шаҳарларининг диққатга сазовор жойларини кўздан кечиришди.