ЕХҲТ лойиҳасининг кибержиноятчиликка қарши курашиш салоҳиятини мустаҳкамлаш бўйича якуний тадбирда иштирок этилди

Ўзбекистон Республикаси Ҳуқуқни муҳофаза қилиш академияси вакиллари Австриянинг Вена шаҳрида бўлиб ўтган ЕХҲТ нинг "Марказий Осиёда кибержиноятчиликка қарши курашиш салоҳиятини ривожлантириш (2020–2024)" минтақавий лойиҳасининг якуний тадбирида иштирок этди.

Тадбир доирасида иштирокчилар лойиҳанинг биринчи босқичи натижаларини муҳокама қилдилар, кибертаҳдидларга қарши курашиш бўйича жаҳон тенденциялари ва энг яхши амалиётларни кўриб чиқдилар. Минтақадаги ихтисослаштирилган ўқув юртларининг салоҳиятини ривожлантиришга алоҳида эътибор қаратилди.

Академия бошлиғининг биринчи ўринбосари Е.В.Коленко ўз маърузасида лойиҳанинг Ўзбекистондаги юқори натижаларини таъкидлаб ўтди. Хусусан, мамлакатимиз ҳуқуқни муҳофаза қилиш органларининг 150 нафардан ортиқ ходими мунтазам равишда ўқитилди, бу эса кибержиноятларни тергов қилиш соҳасида уларнинг иш самарадорлигини оширишга ёрдам берди. Бундан ташқари, лойиҳа доирасида ихтисослаштирилган ўқув юртларида, шу жумладан Ўзбекистон Республикаси Ҳуқуқни муҳофаза қилиш академиясида тўлиқ жиҳозланган компьютер синфлари ва лабораториялари ташкил этилди.

Ўзбекистон делегацияси шунингдек, Будапештдаги CEPOL Европа полиция коллежида брифингда иштирок этиб, кибержиноятчиликка қарши курашиш соҳасидаги илғор ўқитиш услублари билан танишди.

ЕХҲТ Котибиятидаги якуний учрашувлар давомида кибержиноятчиликка қарши курашиш соҳасидаги таълим стратегияларини ишлаб чиқиш ва замонавий ҳуқуқни муҳофаза қилиш органлари ходимлари учун зарур бўлган компетенциялар масалалари муҳокама қилинди.

Лойиҳанинг Марказий Осиё мамлакатлари ҳуқуқни муҳофаза қилиш органларининг салоҳиятини ривожлантиришга ижобий таъсирини ҳисобга олган ҳолда, уни яна икки йилга узайтириш тўғрисида қарор қабул қилинди. Иккинчи босқич таълим муассасалари салоҳиятини янада ошириш, электрон далилларни аниқлаш ва таҳлил қилиш имкониятларини кенгайтириш, минтақавий ҳамкорликни мустаҳкамлаш ва кибертаҳдидлар ҳақида хабардорликни оширишга қаратилади.

Мазкур ташриф ва унинг доирасидаги тадбирлар халқаро ҳамкорликни мустаҳкамлаш, кибержиноятчиликка қарши курашиш соҳасида илғор тажриба ва билимлар алмашинувига ҳисса қўшди, шунингдек, мамлакат ҳуқуқни муҳофаза қилиш органларининг ушбу соҳадаги салоҳиятини ривожлантириш бўйича келгуси қадамларни белгилаб олишга имкон берди.