Коррупцияга қарши курашиш соҳасидаги билимларни узлуксиз ошириш тизими жорий этилмоқда

Ўзбекистон Республикасининг “Коррупцияга қарши курашиш тўғрисида”ги Қонунига мувофиқ аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш коррупцияга қарши курашиш соҳасидаги давлат сиёсатининг асосий йўналишларидан бири ҳисобланади.

Ўзбекистон Республикаси Президентининг жорий йил 21 июнь куни имзоланган “Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирлари тўғрисида”ги ПҚ-228-сонли қарори айнан ушбу долзарб масалани ҳал қилишга қаратилган.

Президент қарорига мувофиқ, Коррупцияга қарши курашиш агентлиги ҳамда Ҳуқуқни муҳофаза қилиш академияси томонидан 2025 йил 1 январдан “Коррупцияга қарши курашиш виртуал академияси” электрон платформаси ва унинг мобиль иловасини ишга туширади.

Академиянинг ушбу тизим доирасида:

Виртуал академиянинг узлуксиз ишлашини, ўқув контенти ва материаллари билан мунтазам тўлдирилиши ва янгилаб борилишини таъминлайди;

коррупцияга қарши курашиш соҳасида ўқув жараёнини ташкил этади, шу жумладан ўқув режалари ва дастурларини ишлаб чиқади, ўқув курслари ҳақидаги маълумотларни Виртуал академияда жойлаштиради;

тингловчиларнинг билимларни ўзлаштириши натижалари бўйича электрон маълумотлар базасини шакллантиради, ўқув курсларини тамомлаган шахсларнинг реестрини юритади;

ўқув жараёнига давлат органлари ва ташкилотларининг, олий таълим ва илмий-тадқиқот муассасаларининг малакали мутахассисларини, шу жумладан хорижий экспертларни жалб қилади.

Виртуал академияда коррупцияга қарши курашиш бўйича ўқитиш базавий ҳамда махсус ўқув курслари асосида:

аҳоли, тадбиркорлик субъектлари, нодавлат нотижорат ташкилотлари ва бошқа фуқаролик жамияти институтлари вакиллари;

таълим ташкилотлари тарбияланувчилари, ўқувчилари ва талабалари;

давлат органлари ва ташкилотларининг давлат хизматчилари;

давлат иштирокидаги корхоналарнинг ходимлари каби контингент учун олиб борилади.

Давлат органлари ва ташкилотлари ўз ходимларининг коррупцияга қарши курашиш соҳасида малакасини мунтазам ошириб боришларини таъминлаб боради.

Бунда, базавий ўқув курсларида ўқитиш бепул, махсус ўқув курслари тўлов-шартнома асосида амалга оширилади (малака ошириш харажатлари давлат органи ёки ташкилотига ушбу мақсадлар учун назарда тутилган бюджет ва бюджетдан ташқари маблағлари ҳамда бошқа манбалар ҳисобидан қопланади).

Давлат хизматчилари махсус ўқув курсларида малака ошириши мажбурий бўлиб, ишга қабул қилинганидан сўнг уч ой ичида, кейинчалик ҳар уч йилда камида бир марта малака оширади.

Коррупцияга қарши ички назорат тузилмалари ва коррупциявий хавф-хатарлар юқори бўлган давлат хизмати лавозимларида фаолият кўрсатувчи ходимлар учун махсус курслар чуқурлаштирилган ўқув дастурлари асосида олиб борилади.

Махсус ўқув курсларини муваффақиятли тамомлаган шахсларга белгиланган намунадаги сертификат берилади.

Шунингдек, Академия томонидан коррупцияга қарши курашиш соҳасида эришилган ютуқлар, миллий ва хорижий тажриба, илмий, услубий ва амалий ишланмалар ҳамда илмий-тадқиқот ишлари бўйича электрон маълумотлар базасини муаллифлик ҳуқуқларига риоя қилган ҳолда Виртуал академияда юритади.

Бундан ташқари, таълим олувчилар учун Коррупцияга қарши таълим ва ёшларнинг имкониятларини кенгайтириш глобал ресурси (GRACE) дастури доирасида сифатли мультипликацион фильм, видеолавҳа ва аудиоматериалларни яратилиб, Виртуал платформа орқали фойдаланувчиларга етказиб борилади.