Кибержиноятларни тергов қилиш салоҳиятини юксалтириш бўйича тренинг

Ўзбекистон Республикаси Ҳуқуқни муҳофаза қилиш академияси томонидан Буюк Британия ва Шимолий Ирландия Бирлашган Қироллиги билан ҳамкорликда АҚШ дастури кўмагида “Очиқ манбалардан ахборот тўплаш усуллари (OSINT)” мавзусида Ўзбекистон Республикаси Бош прокуратураси, Иқтисодий жиноятларга қарши курашиш департаменти, Давлат хавфсизлик хизмати ҳамда Академия профессор-ўқитувчилари учун тренинг ташкил этилди.

Тренинг очилиш маросимида Буюк Британиянинг Осиё минтақасида терроризмга қарши кураш бўйича катта дипломати Крис Фелтон ҳамда Мудофаа вазирлигининг терроризмга қарши кураш бўйича минтақавий координатори Дин Макмастер иштирок этди.

Тўрт кун давом этган тренинг машғулотлари Академия киберлабораториясида Ахборот барқарорлиги маркази (Center for Resilience) нодавлат нотижорат ташкилоти экспертлари Бенджамин ден Брабер ҳамда Риккардо Валле томонидан олиб борилди.

Тренинг иштирокчилари очиқ манбалардан ва ижтимоий тармоқлардан иш учун аҳамиятга эга рақамли маълумотлар (расм, тасвир ва уларнинг ўзига хос белгилари)ни қидиришда эътибор бериладиган жиҳатлар ҳамда методлар, хронолокация, геофазовий қидириш содир этилган жиноятга алоқадор шахсларни излаш ҳақидаги маълумотлар билан таништирилди.

Тренинг давомида иштирокчилар жиноятга алоқадор расмлардаги хос белгилар орқали қаерда содир этилганини очиқ манбаларга таянган ҳолда аниқлаш ва мазкур қидирув жараёнига керак бўладиган OSINT воситалардан (Google Map, Yandex Map, Google Earth Pro) тўғри самарали фойдаланишни ўргандилар.

Шунингдек, тадбир давомида рақамли маълумотлар ёки файлларнинг яхлитлигини текшириш, метамаълумотлар орқали объектни яратиш, тарқатиш ва ўзгартириш ҳолатларини ҳамда у билан боғлиқ геомаълумотларни аниқлаш; “Google Earth Pro” дастурий таъминоти орқали объектнинг жойлашишини, фаолиятини ёки жисм яратилган жойни аниқлаш ва баҳолаш ҳамда суръатдаги ноёб географик объектларни харитадаги ҳақиқий жойлашуви билан таққослаш; ижтимоий тармоқлардаги маълумотларни таҳлил қилиш, ундаги жиноятга алоқадор шахслар ва улар билан алоқа ўрнатган шахсларни аниқлаш орқали гуруҳлар ва ташкилотлар ўртасидаги ўзаро муносабатларни ўрганиш масалалари атрофлича ўрганилди.

Тренинг якунида олинган билимлардан фойдаланиш бўйича тавсиялар берилди, шунингдек, иштирокчилар томонидан бундай тадбирларни янада кенгайтирилган шаклда мунтазам ўтказиб туриш мақсадга мувофиқлиги ҳақида фикр-мулоҳазалар билдирилди.

Тренинг иштирокчиларига сертификатлар тақдим этилди.