Академияга янги қабул қилинган талабалар учун Барқарор ривожланиш мақсадлари билан таништирув ташкил этилди

2024/2025 ўқув йилига кириш ҳафталиги доирасида Ҳуқуқни муҳофаза қилиш академиясининг янги қабул қилинган талабалари учун Барқарор ривожланиш мақсадлари (БРМ) бўйича танишув тадбири ташкил этилди. Мазкур тадбирнинг мақсади талабаларни ушбу муҳим глобал мақсадлар билан таништириш ва мазкур мақсадларнинг амалга оширилишида талабаларнинг ўз ҳиссаларини қўшишишига замин яратиш ҳисобланади.

Маълумот учун, Барқарор ривожланиш мақсадлари 2015 йилда БМТ Бош Ассамблеяси томонидан қабул қилинган ва 2030 йилгача мўлжалланган чора-тадбирларни ўз ичига олади. Улар глобал қашшоқликни тугатиш, иқлим ўзгаришига қарши курашиш, тинчликпарвар, адолатли ва самарали институтларни яратишга қаратилган 17 та глобал мақсадни ўз ичига олади. Ушбу мақсадлар инсоният келажаги учун муҳим аҳамиятга эга ва ҳар бир инсоннинг кундалик ҳаётига таъсир қилади. Академия “Самарали бошқарув” бўйича миллий БРМ эксперт гуруҳининг ишчи органи ҳисобланади.

Тадбирда БРМнинг асосий йўналишлари – иқтисодий ўсиш, ижтимоий инклюзивлик, атроф-муҳитни муҳофаза қилиш ва самарали бошқарув билан боғлиқ глобал ва миллий мақсад ва вазифалар ҳақида батафсил маълумот берилди. Шунингдек, Академия томонидан БРМ йўналишида амалга оширилаётган ишлар, лойиҳа ва ташаббуслар тўғрисида батафсил ахборот берилди. Бунда Академиянинг БРМ ташаббусларига талабалар қандай ҳисса қўшиши мумкинлиги аниқ мисоллар ёрдамида тушунтириб берилди. Хусусан, масъулиятли истеъмол, чиқиндиларни саралаш, энергия, сув ва бошқа табиий ресурсларни тежаш, яшил транспортдан фойдаланиш орқали БРМ мақсадларига эришишга ҳисса қўшиш таъкидланди.

Тадбир якунида Академиянинг халқаро ҳамкорлик фаолияти, талабаларнинг халқаро танловлар, лойиҳа ва дастурлардаги иштироки масалалари атрофлича ёритилди. Мазкур тадбир талабаларга барқарор ривожланишнинг аҳамияти ҳақида тушунчалари шаклланишига ҳамда уларнинг глобал мақсадларни амалга оширишдаги ролини оширишга хизмат қилади.