“Киберҳуқуқ: муаммолар ва ривожлантириш истиқболлари” мавзусида халқаро илмий-амалий конференция

Ўзбекистон Республикаси Ҳуқуқни муҳофаза қилиш академиясида “Киберҳуқуқ: муаммолар ва ривожлантириш истиқболлари” мавзусида халқаро илмий-амалий конференция ташкил этилди.

Анжуман Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сон Фармони ҳамда 2024 йил 21 июндаги “Рақамли криминалистика соҳасида илмий-тадқиқот фаолиятини ташкил этиш чора-тадбирлари тўғрисида”ги ПҚ–229-сон Қарорида белгиланган вазифалар ижросини таъминлаш мақсадида ташкил этилди.

Бугунги кунда ҳаётимизнинг деярли барча жабҳаларига рақамли технологиялар кириб келиб, улар нафақат одамлар ўртасидаги мулоқот шаклларини, балки иқтисодиёт, таълим, соғлиқни сақлаш ва давлат бошқаруви каби соҳаларни ҳам тубдан ўзгартирмоқда. Мазкур технологиялар ижтимоий мулоқотни осонлаштиришга, яшаш шароитларини қулайлаштиришга хизмат қилмоқда.

Шу билан бирга, рақамли дунё киберхавфсизлик, ахборотнинг махфийлиги, шахсий маълумотларнинг ҳимояси, кибержиноятчилик ва сўз эркинлиги каби долзарб масалаларни ҳам ўртага ташлади. Aйнан мана шу муаммолар киберҳуқуқ соҳасининг ривожланишини тезлаштириш заруриятини кўрсатади.

Маълумки, киберҳуқуқ – бу замонавий даврнинг янги ҳуқуқий йўналиши бўлиб, рақамли майдондаги ҳуқуқий тартибга солиш билан боғлиқ. Конференция киберҳуқуқ соҳасидаги муҳим амалий ва назарий муаммолар ҳамда унинг ечимларини муҳокама қилишга қаратилган.

Конференцияда Академиянинг профессор-ўқитувчилари, мустақил изланувчилари ва таянч докторантлари, магистратура ва бакалавриат босқичи талабалари Ҳиндистон Миллий суд экспертизаси университети, Қозоғистон Республикаси Ҳуқуқни муҳофаза қилиш академияси, Жамоат хавфсизлиги университети, ДХХ академияси, ИИВ академияси, ТДЮУ, ТАТУ, Инха университети, Турин Политехника Университети, ИИВ “Киберхавфсизлик маркази”, Ўзбекистон Республикаси Президенти ҳузуридаги Қонунчилик ва ҳуқуқий сиёсат институти, Фанлар академияси Давлат ва ҳуқуқ тарихи институти, Рақамли технологиялар ва сунъий интеллектни ривожлантириш илмий-тадқиқот институти вакиллари иштирок этди.

Тадбирда киберҳуқуқ соҳасидаги мавжуд муаммоларни чуқур ўрганиш, уларга самарали ечимлар таклиф қилиш ва келгусида ривожлантириш истиқболларини белгилаш бўйича фикр алмашилди.

Жумладан, рақамли дунё киберхавфсизлик, ахборотнинг махфийлиги, шахсий маълумотларнинг ҳимояси, сўз эркинлигини таъминлаш ва кибержиноятчиликка қарши курашиш каби долзарб масалалар киберҳуқуқ соҳасининг тез суратларда ривожланишни тақозо этаётганлиги таъкидланди.

Кун тартибидаги масалаларнинг яна бир муҳим жиҳати – рақамли макондаги ҳуқуқларни ҳимоя қилиш масаласи глобал миқёсда кўтарилаётган муаммолар билан боғлиқ эканлигидадир.

Ҳар бир мамлакатнинг ўз ҳуқуқий тизими ва ахборот хавфсизлигини таъминлаш борасида ўзига хос ёндашуви бор. Шу сабабли, бугунги кунда киберҳуқуқни халқаро даражада ривожлантириш, давлатлар ўртасида ҳамкорликни кучайтириш, умумий меъёрларни ишлаб чиқиш ва уларни амалга ошириш зарурдир.

Конференция иштирокчилари томонидан шунингдек рақамли инфратузилма ва ҳуқуқий муҳитни биргаликда мустаҳкамлаш, инновацияларни ҳуқуқий тартибга солиш ва янги технологиялар асосида пайдо бўлаётган таҳдидларни олдини олиш борасида ҳамкорликнинг аҳамияти, кибержиноятчилик тобора кучайиб бораётган шароитда, ахборот алмашинуви, жиноятларга қарши курашишда самарали ҳуқуқий механизмларни ишлаб чиқиш каби долзарб масалалар юзасидан фикр-мулоҳазалар билдирилди.

Тадбир якунида конференция иштирокчилари ўзларини қизиқтирган саволларга мутахассислардан жавоб олдилар.