Маъмурий тартиб-таомилларнинг принциплари бўйича қўлланма тақдимоти

Миллий ва япониялик экспертлардан иборат муаллифлар жамоаси томонидан нашрга тайёрланган маъмурий тартиб-таомилларнинг алоҳида принциплари бўйича қўлланма тақдимоти бўлиб ўтди.

Тадбирда Япония Адлия вазирлиги, Нагоя иқтисодиёт университети ва Ўзбекистоннинг 20 дан ортиқ давлат муассасалари вакиллари қатнашди.

Қўлланмани тайёрлашда Адлия вазирлиги, Олий суд, Ҳуқуқни муҳофаза қилиш Академияси, Тошкент Давлат юридик университети вакилларидан иборат миллий экспертлар жамоаси иштирок этди.

Ушбу қўшма нашр “Маъмурий тартиб-таомиллар тўғрисида”ги Ўзбекистон Республикаси Қонунига илмий-амалий шарҳ тайёрлаш бўйича ишларнинг биринчи босқичи натижасидир.

Қўлланмада “қонунийлик”, “мутаносиблик”, “тинглаш имкониятининг мавжудлиги”, “тенг ҳуқуқлилик” “ишончнинг ҳимоя қилиниши”, “маъмурий ихтиёрийликнинг (дискрецион ваколатнинг) қонунийлиги” каби олтита алоҳида тамойилни изоҳлаб берувчи маълумотлар мавжуд.

Бундан ташқари, қўлланмада асосий тушунчалар батафсил изоҳланган, Ўзбекистон ва Япониянинг ҳуқуқни қўллаш амалиётидан мисоллар ҳамда маъмурий тартиб-таомилларнинг асосий принципларини қўллаш бўйича тавсиялар келтирилган.

Қўлланма маъмурий-ҳуқуқий фаолият соҳаси ходимлари, тадқиқотчилар, талабалар ва кенг жамоатчилик учун мўлжалланган ҳамда тушунарли тилда ёзилган бўлиб, ўз навбатида қўлланма кенг аудиторияда фойдаланиш учун мўлжалланган.