“Коррупцияга қарши курашиш, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш: замонавий муаммолар ва тенденциялар” параллел сессияси

Ҳуқуқни муҳофаза қилиш академияси ташкил этилганлигининг икки йиллигига бағишланган “Ҳуқуқни муҳофаза қилиш фаолияти соҳасидаги глобал чақириқлар ва таҳдидлар: замонавий стратeгиялар ва eчимлар” мавзусидаги халқаро илмий-амалий конференцияси доирасида “Коррупцияга қарши курашиш, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш: замонавий муаммолар ва тенденциялар” параллел сессияси ўтказилди.

Мазкур сессия Академия томонидан Халқаро коррупцияга қарши курашиш ойлиги доирасида ўтказилиши режалаштирилган тадбирлар туркумини бошлаб берди.

Сессия давомида коррупцияга қарши курашиш ва унинг олдини олиш соҳасида Ўзбекистон, Буюк Британия, АҚШ, Қозоғистон, Россия Федерацияси, Беларусь, Гонконг, Словения, Қирғиз Республикасининг илмий, амалий, академик соҳа вакиллари қайд этилган соҳаларда муаммолар ва ечимлар ҳақида сўз юритишди.

Шунингдек, БМТ Гиёҳванд моддалар ва жиноятчилик бўйича бошқармаси, Осиё ва Тинч океани учун иқтисодий ва ижтимоий комиссия (EСКАТО), “Минтақавий мулоқот” ХННТ, CERT Академияси каби ташкилотлар вакиллари халқаро ҳужжатларда, жумладан БМТнинг Коррупцияга қарши конвенцияси, ISO 37001:2016 “Порахўрликка қарши курашиш” стандартининг коррупцияга қарши курашиш ва унинг олдини олишдаги ўрнини қайд этишди.

Шу каби, тадбирда Ўзбекистон Республикаси Бош прокуратураси, Россия Федерацияси Бош прокуратураси, Коррупцияга қарши курашиш агентлиги, Гонконг Коррупцияга қарши мустақил комиссияси, Ўзбекистон Иқтисодий жиноятларга қарши курашиш департаменти, Қозоғистон Молиявий мониторинг агентлиги, Қозоғистон парламенти, Қирғиз Республикаси Президенти ҳузуридаги Коррупцияга қарши курашиш ишбилармонлар кенгаши вакиллари ўз чиқишларида мамлакатларида коррупцияга ва жиноий даромадларни легаллаштиришга қарши курашиш соҳасида янги таҳдидлар ва уларнинг ечимлари борасидаги амалий тажрибалари билан бўлишишди.

Шу билан бирга, илмий ва академик доира вакилларидан чиқиш қилган Ҳуқуқни муҳофаза қилиш академияси, Британиянинг Сассекс университети, Қозоғистон Бош прокуратураси ҳузуридаги Ҳуқуқни муҳофаза қилиш органлари академияси, Россия янги университети ва Амур давлат университети профессор ходимлари ушбу долзарб соҳаларда амалга оширилган тадқиқотлар, уларнинг натижасида ишлаб чиқилаётган илмий таклифлар ва қарашларни баён қилишди. 

Конференциянинг мазкур сессияси иштирокчиларга коррупцияга қарши курашиш, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасида амалга оширилаётган янгича ислоҳотлар, таҳдидларни халқаро стандартлар, илғор хорижий тажриба ва замонавий илмий ёндашувлар орқали олдини олиш бўйича билим ва кўникмаларни оширишга ёрдам берди.

Иштирокчилар коррупция ва жиноий даромадларни легаллаштириш соҳасидаги таҳдидларга биргаликда ечим излаш мақсадида ҳамкорликни янада мустаҳкамлаш ҳақидаги фикр беришди.