Халқаро конференция доирасидаги “Ҳуқуқни муҳофаза қилиш фаолиятида фан ва таълимнинг долзарб масалалари” параллел сессияси якунлари

Ўзбекистон Республикаси Ҳуқуқни муҳофаза қилиш академияси ташкил этилганининг икки йиллиги муносабати билан “Ҳуқуқни муҳофаза қилиш фаолияти соҳасидаги глобал чақириқлар ва таҳдидлар: замонавий стратегиялар ва ечимлар” мавзусидаги халқаро конференция доирасида “Ҳуқуқни муҳофаза қилиш фаолиятида фан ва таълимнинг долзарб масалалари” параллел сессияси бўлиб ўтди.

Мазкур сессия ҳуқуқни муҳофаза қилиш фаолиятини такомиллаштириш мақсадида унга таълим ва илм-фан ютуқларини самарали жорий этишнинг долзарб масалалари юзасидан экспертларнинг ўзаро фикр алмашиши учун кенг имконият яратди.

Параллел сессиянинг асосий мақсади ҳуқуқни муҳофаза қилиш органлари фаолиятида илм-фан ва таълимнинг интеграциясини жорий қилиш, замонавий таҳдидлар шароитида кадрлар тайёрлаш, илмий тадқиқотлар натижаларини ҳуқуқни муҳофаза қилиш фаолиятига жорий этиш механизмларини ривожлантириш, халқаро тажрибанинг ижобий жиҳатларини миллий қонунчиликка имплиментация қилиш, юридик илм-фанни такомиллаштиришда сунъий интеллект технологияларидан фойдаланиш, ҳуқуқни муҳофаза қилиш ходимларининг малакасини оширишга қаратилган ўқув дастурлари, тренинглар ва стажировкалар ташкил этиш борасидаги муаммоларни муҳокама қилиш ва тавсиялар ишлаб чиқишдан иборат.

Сессия ишида хорижий ва миллий экспертлар, етакчи олимлар, соҳа тадқиқотчилари иштирок этдилар.

Франция Магистрлар мактаби директори ўринбосари Ҳ.Булакрас, Қирғизистон Бош прокуратураси академияси ректори И.Дмитриенко, Тергов қўмитаси Санкт-Петербург академияси илмий котиби С.Мелихов, Малайзия Коррупцияга қарши курашиш академияси директор ўринбосари Моҳд Сауд Аётуллоҳ Абдул Маънан, Гданьск университети (Польша) факультет декани ўринбосари Э.Юхневич, Лунд университети (Швеция) профессори П.Олссон, Бутунроссия давлат адлия университети Санкт-Петербург институти профессори А.Смирнов, Гродно давлат университети юридик факультет декани доцент С.Чебуранова, JICA (Япония) эксперти С.Ивама ва бошқалар маъруза қилдилар.

Хорижий экспертлар маърузаларида тергов-прокуратура ходимларини тайёрлаш ҳамда юридик таълимни ташкил қилишга оид хорижий тажриба, ҳуқуқни муҳофаза қилиш соҳасида касбий компетенцияларни шакллантиришда таълим ва илмий фаолиятининг аҳамияти, рақамли трансформация даврида касбий ва юридик таълимнинг муаммо ва истиқболлари, таълимда сунъий интеллектни қўллаш масалалари, шунингдек глобал таҳдидлар ва уларни бартараф этиш йўлларига оид масалалар атрофлича кўриб чиқилди.

Миллий экспертлар ва олимлар чиқишларида илмий фаолиятда сунъий интеллектни қўллаш ва коррупциянинг олдини олиш, республикамизда инсон ҳуқуқлари соҳасида таълимни, шунингдек криминологик тадқиқотларни ривожлантириш истиқболлари, ҳуқуқни муҳофаза қилиш соҳасида илмий тадқиқотлар йўналишлари, ҳолати ва муаммолари муҳокама қилинди.

Назариядаги ҳуқуқий бўшлиқлар ва уларнинг ҳуқуқни муҳофаза қилиш амалиётига таъсири, ҳуқуқни муҳофаза қилиш соҳасини янада такомиллаштиришга йўналтирилган қонунчиликни такомиллаштириш бўйича таклифлар сессиянинг амалий аҳамиятини янада оширди.

Тадбир давомида хорижий давлатлар қонунчилиги ва амалиёти асосида ҳуқуқни муҳофаза қилиш соҳаси учун таълим дастурларини илмий тенденцияларга мослаштириш, инновацион ёндашувларга асосан мулоқот кўникмаларини ривожлантириш, соҳада илмий-изланишларни жадаллаштириш, халқаро ва миллий таълим муассасалари билан ҳамкорликни кучайтириш, ҳамкорликда тадқиқот ва амалий дастурларни амалга ошириш, илмий тадқиқот натижаларини ҳуқуқни муҳофаза қилиш фаолиятига жорий этиш механизмларини ривожлантириш, юридик кадрларни тайёрлаш, қайта тайёрлаш ва уларнинг малакасини оширишга қаратилган таклиф ва тавсиялар билдирилди.

Шунингдек, конференция иштирокчилари томонидан юридик таълим ва илмий изланишларни уйғунлаштириш орқали замонавий таҳдидларга самарали жавоб берувчи ҳуқуқни муҳофаза қилиш тизимини янада такомиллаштириш юзасидан фикр-мулоҳазалар билдирилди.