Ўзбекистон Республикаси
Ҳуқуқни муҳофаза қилиш академияси
Академия ходимлари Косши шаҳрида (Қозоғистон Республикаси) ўтказилган “Электрон далилларга қайта ишлов беришга алоқадор жиноий ишлар бўйича халқаро ҳамкорлик” мавзусидаги минтақавий семинарда иштирок этдилар.
Семинардан кўзланган мақсад хорижий давлатлардаги электрон далилларни сўров қилиш, тўплаш, сақлаш ва улардан фойдаланиш бўйича замонавий ёндашувларни кўриб чиқишдан иборат.
Тадбир Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси томонидан Марказий Осиё ва Жанубий Кавказ мамлакатлари учун халқаро ҳуқуқий ҳамкорлик тармоғи (CASC) билан биргаликда БМТ Гиёҳвандлик ва жиноятчиликка қарши кураш бошқармаси кўмагида ташкил этилди.
Семинарда Озарбайжон, Aрманистон, Грузия, Қозоғистон, Қирғизистон, Тожикистон, Туркманистон ва Ўзбекистон ҳуқуқ-тартибот идораларининг 45 дан ортиқ вакиллари ҳамда AҚШ, Болгария, Германия, Жанубий Корея, Италия, Қозоғистон, Ўзбекистон, ва Япониядан экспертлар маърузалар билан иштирок этди.
Семинар иштирокчиларига бошқа мамлакатлардан электрон маълумотларни сўров қилиш бўйича амалий қўлланмалар, шунингдек, БМТнинг Кибержиноятчиликка қарши кураш ва рақамли далиллар соҳасида халқаро ҳамкорлик тўғрисидаги конвенцияси лойиҳаси тақдим этилди.
Тадбирда Рақамли криминалистика илмий-тадқиқот институти бошлиғи Г.Ф.Мусаев “Электрон далилларни тўплаш, таҳлил қилиш ва сақлаш: рақамли криминалистикада OSINT имкониятлари” мавзусида маъруза қилиб, семинар иштирокчиларида катта қизиқиш уйғотди.
Шунингдек, ташриф давомида бакалавриат факультети бошлиғи Б.Э.Каюмов ва Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси магистратура тингловчилари учрашуви ташкил этилиб, унда Ҳуқуқни муҳофаза қилиш академияси фаолиятининг асосий йўналишлари, таълим дастурлари ва истиқболдаги вазифалари борасида маълумот берилди.
Семинар ижобий тажриба алмашиш ва келгусида ҳуқуқни муҳофаза қилиш соҳаси кадрларини тайёрлаш ва малакасини ошириш борасида халқаро ҳамкорликни янада кенгайтириш учун қулай имконият бўлиб хизмат қилди.
