Йўл-транспорт соҳасида қонунбузилишларнинг олдини олишга қаратилган қўшма лойиҳанинг дастлабки босқичи якунлари

Ҳуқуқни муҳофаза қилиш академиясида Япониянинг халқаро ҳамкорлик агентлиги (JICA) билан ҳамкорликда амалга ошириб келинаётган “Йўл ҳаракати хавфсизлиги” қўшма лойиҳасининг дастлабки (пилот) босқичи натижалари тақдимоти бўлиб ўтди.

Мазкур лойиҳа доирасида 2024 йил сентябрь – ноябрь ойларида Тошкент шаҳрининг Юнусобод тумани ҳамда Тошкент вилоятининг Янгийўл шаҳрида йўл-транспорт ҳодисаларининг олдини олишга қаратилган пилот лойиҳа амалга оширилди.

Лойиҳани амалга ошириш давомида жами 6 нафар Япониялик экспертнинг мамлакатимизга ташрифи амалга оширилиб, йўл-транспорт ҳодисалари билан боғлиқ мавжуд вазият тегишли ташкилотлар билан ҳамкорликда, мавжуд маълумотларни таҳлил қилиш орқали ҳамда бевосита йўл-транспорт ҳодисалари ўчоқларига чиққан ҳолда ўрганилди.

Лойиҳа мавзуси долзарблигидан келиб чиққан ҳолда, йўл-транспорт ҳодисаларининг олдини олишга қаратилган фаолиятга кенг жамоатчиликни жалб қилиш мақсадида махсус телеграм бот яратилди ва у орқали аҳолидан келиб тушган хабарлар йўл-транспорт ҳодисалари ўчоқлари бўйича яратилган махсус ишга туширилган GIS харитада акс эттирилди.

Лойиҳанинг пилот босқичини амалга ошириш жараёнида хорижий экспертлар билан бир қаторда 12 нафар миллий экспертлар ҳам иштирок этди.

Лойиҳанинг дастлабки босқичидаёқ амалий аҳамиятга эга бўлган натижаларга эришилди. Хусусан, аниқланган йўл-транспорт ҳодисалари ўчоқларини бартараф этиш бўйича бир қатор реконструкция ишларини амалга ошириш назарда тутилган. Жумладан Тошкент шаҳри, Юнусобод тумани 272-мактаб олдидаги йўл белгиларини янгилаш, автомашиналар мактаб олдида тўхтаб туришини ҳамда авария ҳолатларини вужудга келтиришининг олдини олиш мақсадида махсус каучук устунлари ҳамда тезликни чегараловчи йўл қопламаси ўрнатиш, Янгийўл шаҳри бозори олдидаги йўлда йўл белгиларини янгилаш (зебра чизиқлари, йўналтирувчи стрелкалар, тўхташ чизиқлари), тезликни чегараловчи махсус йўл қопламаси ўрнатиш ҳамда хавфсизлик оролини ўрнатиш режалаштирилган.

Мазкур ишларни амалга ошириш билан боғлиқ барча харажатлар Япония тарафи томонидан қопланиши белгиланган.

Шунингдек, пилот лойиҳа давомида хорижий мутахассислар томонидан миллий экспертлар билан бирга Тошкент шаҳридаги мактабларда йўл ҳаракати хавфсизлиги бўйича тадбирлар ўтказилди.    

Пилот лойиҳа якуни бўйича миллий ва хорижий экспертлар тарафидан махсус ҳисобот тайёрланган бўлиб, мазкур ҳисоботнинг кенг жамоатчиликка тақдимоти ўтказилди.