Омбудсман ва ёшлар учрашуви

2025 йил 20 февраль куни Ўзбекистон Республикаси Олий Мажлиснинг Инсон ҳуқуқлари бўйича Вакили (Омбудсман), ю.ф.д. Ф.Ф.Эшматова  Академиянинг бакалавриат талабалари, магистратура тингловчилари ва докторантлар билан учрашув ўтказди. “Омбудсман ва ёшлар” рукнида ўтказилган мазкур учрашувда инсон ҳуқуқлари соҳасидаги замонавий тенденциялар муҳокама қилинди.

Кейинги йилларда Ўзбекистонда инсон ҳуқуқларини ҳимоя қилиш, демократияни мустаҳкамлаш ва фуқаролик жамиятини ривожлантириш йўналишида катта ўзгаришлар амалга оширилмоқда. Бу жараёнда ёшларнинг иштироки ва фаоллиги алоҳида аҳамият касб этади. Мазкур тадбир инсон ҳуқуқлари соҳасида олиб борилаётган ислоҳотларни ёритиш, ёшларнинг бу борадаги ўрнини ва имкониятларини муҳокама қилишга қаратилган.

Тадбирда иштирокчилар инсон ҳуқуқлари соҳасидаги ўзгаришлар, ҳуқуқий таълимнинг аҳамияти ва демократиянинг мамлакат тараққиётидаги ўрни ҳақида фикр алмашдилар. Феруза Эшматова ўз чиқишида Янги Ўзбекистон тараққиёт стратегияси доирасида инсон ҳуқуқлари, эркинликлари ва демократияга алоҳида эътибор қаратилаётганини таъкидлади. У мамлакатда амалга оширилаётган ҳуқуқий ислоҳотлар, миллий қонунчиликни халқаро стандартларга мослаштириш ҳамда инсон ҳуқуқлари соҳасидаги илғор тажрибаларни жорий этишга қаратилган ташаббуслар ҳақида сўзлаб берди.

Учрашувга юздан ортиқ талаба, магистр ва тадқиқотчилар таклиф этилган бўлиб, улар ҳуқуқий масалалар юзасидан ўз қарашлари ва таклифларини баён қилиш имкониятига эга бўлдилар. Ушбу учрашув ёшларнинг ҳуқуқий онгини ошириш, уларнинг давлат ва жамият ҳаётида фаол иштирокини рағбатлантириш ҳамда халқаро ҳуқуқ соҳасида билимларини мустаҳкамлашга йўналтирилган муҳим ташаббус сифатида баҳоланди.

Тадбир якунида Ўзбекистон Республикаси Омбудсмани Ҳуқуқни муҳофаза қилиш академияси фаолияти билан танишди. Академиядаги замонавий таълим жараёнлари, илмий-тадқиқот ишлари ва талабалар учун яратилган шарт-шароитлар юксак баҳоланди. Бу муассаса инсон ҳуқуқлари соҳасида малакали мутахассислар тайёрлашда муҳим аҳамият касб этиши таъкидланди.

Ушбу учрашув ёшларнинг ҳуқуқий билим ва малакасини ошириш, уларни жамият ва давлат ишларида фаол иштирок этишига рағбатлантиришга йўналтирилгани билан аҳамиятли бўлди. Тадбир иштирокчилари инсон ҳуқуқлари ҳимояси ва ривожи йўлида фаол ҳаракат қилиш зарурлигини яна бир бор ҳис қилдилар. Демократик жамиятда ҳар бир фуқаро, айниқса, ёшлар ўз ҳуқуқларини билиши ва улардан тўғри фойдаланиши муҳимдир. Бу эса мамлакат тараққиёти ва ҳуқуқий маданиятини юксалтиришда асосий омиллардан бири ҳисобланади.