“Ҳуқуқни муҳофаза қилиш фаолиятида сунъий интеллект: хавфсизликни таъминлаш учун инновацион технологиялар” илмий-амалий давра суҳбати

Ўзбекистон Республикаси Ҳуқуқни муҳофаза қилиш академияси томонидан “Марказий Осиё Сунъий интеллект ассоциацияси” билан ҳамкорликда “Ҳуқуқни муҳофаза қилиш фаолиятида сунъий интеллект: хавфсизликни таъминлаш учун инновацион технологиялар” мавзусида илмий-амалий давра суҳбати ўтказилди.

Маълумки, бугунги кунда дунёда замонавий технологиялар, айниқса, сунъий интеллект технологиялари барча соҳаларда, жумладан, ҳуқуқни муҳофаза қилиш тизимида муҳим ўрин эгалламоқда. Бу технологиялар ўзгаришлар ва инновацияларни юзага келтиришда пойдевор вазифасини ўтамоқда.

Давлат раҳбари ва республика Ҳукумати томонидан мамлакатимизда сунъий интеллект технологияларини ривожлантириш бўйича қатор ҳуқуқий ҳужжатлар қабул қилинди. Шу жумладан, Сунъий интеллект – 2030 стратегияси ҳам қабул қилинди.

Сунъий интеллектнинг ҳуқуқни муҳофаза қилиш фаолиятида, шу жумладан, ҳуқуқни муҳофаза қилиш органлари ва суд тизимида қўлланилиши – бугунги куннинг долзарб масалаларидан бири ҳисобланади.

Ўзбекистон Республикаси Ҳуқуқни муҳофаза қилиш академияси сунъий интеллект технологияларининг амалий қўлланишини тадқиқ қилиш, таълим муассасалари ва ҳуқуқни муҳофаза қилиш органлари ўртасида самарали ҳамкорликни таъминлаш борасида фаол иш олиб боришни мақсад қилган.

Давр суҳбати сунъий интеллект технологияларини одил судлов, ҳуқуқни муҳофаза қилиш ва хавфсизлик тизимларига интеграция қилиш билан боғлиқ имкониятлар ва муаммоларни таҳлил қилиш, сунъий интеллект технологияларини қўллаш бўйича илғор тажрибаларни алмашиш, сунъий интеллект технологияларини қўллаш бўйича муваффақиятли амалий кейсларни муҳокама қилиш ҳамда одил судлов, ҳуқуқни муҳофаза қилиш ва хавфсизлик тизимларига сунъий интеллектни самарали жорий этиш учун стратегик тавсиялар, қонунчилик базасини такомиллаштиришга оид таклифлар ва амалий илмий ёндашувларни илгари суриш учун муҳим пойдевор бўлиб хизмат қилади.

Тадбирда Ўзбекистон Республикаси Конституциявий суди, Олий суди, Судьялар олий кенгаши, ҳуқуқни муҳофаза қилувчи органлар амалиётчи ходимлари, Судьялар олий мактаби, Рақамли технологиялар вазирлиги, “UzbekVoice” компанияси, ИИВ, ФВВ ва ДХХ академиялари, Давлат божхона қўмитаси Божхона ҳарбий институти, Жамоат хавфсизлиги университети, ТДЮУ, Криминологик тадқиқотлар институти, ТАТУ, Академия талабалари ва тингловчилари ҳамда мамлакатимизда сунъий интеллект технологиялари соҳасида фаолият олиб бораётган бизнес ва нодавлат ташкилотлари экспертлари иштирок этишди.

Шунингдек, тадбирда Россия Федерацияси, Қозоғистон, Қирғизистон, Тожикистонлик соҳа вакиллари онлайн тарзда қатнашишди.

Давра суҳбатида мавзу доирасида мавжуд муаммоларни чуқур ўрганиш, уларга самарали ечимлар таклиф қилиш ва келгусида ривожлантириш истиқболларини белгилаш бўйича фикр алмашилди.

Тадбир доирасида Ўзбекистон Республикаси Ҳуқуқни муҳофаза қилиш академияси ҳамда Марказий Осиё Сунъий интеллект ассоциацияси ўртасида, шунингдек Ўзбекистон Республикаси Ҳуқуқни муҳофаза қилиш академияси ва Криминологик тадқиқотлар институти ўзаро ҳамкорлик тўғрисида меморандумлар имзоланди.

Тадбир якунида савол-жавоблар бўлиб ўтди. Мавзуга оид маъруза, мақола ва тезислар тўплам шаклида нашр қилиниши назарда тутилган.