“IТ технологияларидан фойдаланиб жиноят содир этишнинг замонавий усуллари ҳамда тергов қилиш муаммолари” мавзусидаги илмий-амалий конференцияси

Ўзбекистон Республикаси Ҳуқуқни муҳофаза қилиш академиясида турган “IТ технологияларидан фойдаланиб жиноят содир этишнинг замонавий усуллари ҳамда тергов қилиш муаммолари” мавзусидаги республика илмий-амалий конференцияси ўтказилди.

Конференцияда Ўзбекистон Республикаси Бош прокуратураси, ИИВ Тергов департаменти, Криминология тадқиқот институти, Давлат хавфсизлиги хизмати академияси, Жамоат хавфсизлиги университети, ИИВ академияси, Божхона қўмитасининг Божхона институти, Тошкент давлат юридик университети ҳамда Ҳуқуқни муҳофаза қилиш академиясининг профессор-ўқитувчилари ва тадқиқотчилари иштирок этишди.

Конференция кибержиноятларнинг замонавий усулларини таҳлил қилиш ва жиноятчиликнинг янги тенденцияларини ўрганиш, тергов амалиётидаги муаммоларни аниқлаш ва самарали ечимлар таклиф этиш, миллий қонунчиликни такомиллаштириш ва халқаро тажрибадан фойдаланиш, ҳуқуқни муҳофаза қилувчи органлар ва IT мутахассислар ўртасида ҳамкорликни кучайтириш, ахборот хавфсизлигини таъминлаш ва жиноятларнинг олдини олиш механизмларини ишлаб чиқиш, шунингдек, тергов амалиётини такомиллаштиришга хизмат қилади.

Конференцияни Ҳуқуқни муҳофаза қилиш академияси бошлиғининг биринчи ўринбосари Е.В.Коленко очиб бериб, конференция мавзусининг долзарблиги, мамлакатимизда бу борада олиб борилаётган давлат сиёсатининг асосий жиҳатлари, шунингдек аниқ ҳолатлар мисолида ҳуқуқни муҳофаза қилиш фаолиятининг мазкур соҳадаги хавф-хатарларида тўхталиб, Академиянинг тергов соҳаси кадрларининг рақамли жиноятларни тергов қилиш салоҳиятини ошириш бўйича амалга ошираётган изчил фаолияти билан иштирокчиларни таништирди. Кибержиноятчиликка қарши курашиш соҳасида халқаро ва идоралараро ҳамкорликни кучайтириш зарурати алоҳида таъкидлаб ўтилди.

Конференция давомида жиноятларни тергов қилишда рақамли криминалистиканинг ўрни, компьютер ахборотига қонунга хилоф равишда кириш жиноятини тергов қилиш методикаси, IТ соҳаси билан боғлиқ жиноятларнинг таркибий элементлари, ахборот технологияларидан фойдаланиб содир этиладиган жиноятлар бўйича рақамли маълумотларни олиш бўйича мавжуд муаммолар, бу соҳадаги содир этилаётган жиноятлар бўйича ўтказиладиган тергов ва процессуал ҳаракатларининг ўзига хос жиҳатлари ва бошқа шу каби долзарб мавзулар муҳокама этилди.

Интернет ижтимоий тармоқларида қонунга хилоф равишда гиёҳвандлик моддаларини муомалага кириш билан боғлиқ жиноятлар, иш юритишни истисно қилувчи ҳолатларни мезонларини баҳолашда рақамли технологиялардан фойдаланиш, банклар ва банк карталаридан пул маблағларини ўғирлик йўли билан талон торож қилиш жиноятларини тергов қилишнинг ўзига хос хусусиятлари мавзуларидаги чиқишлар иштирокчиларда алоҳида қизиқиш уйғотди.

Муҳокамалар жараёнида иштирокчилар ўзларини қизиқтирган саволларга тўлиқ жавоблар олдилар.

Конференция материаллари тўплами чоп этилиши режалаштирилган.