"Ногиронлиги бўлган шахслар ҳуқуқлари ва прокурор назорати" янги илмий рисоласи нашр этилди

Ўзбекистонда инсон ҳуқуқларини таъминлаш ва ҳимоя қилиш соҳасида амалга оширилаётган ислоҳотларнинг муҳим йўналишларидан бири сифатида ногиронлиги бўлган шахсларнинг ҳуқуқларини таъминлаш ва уларнинг жамиятга тўлиқ интеграциясини қўллаб-қувватлаш белгиланган. Ана шундай муҳим соҳани илмий таҳлил қилиш мақсадида Ўзбекистон Республикаси Ҳуқуқни муҳофаза қилиш академияси Халқаро ҳуқуқ ва инсон ҳуқуқларини ҳимоя қилиш кафедраси ҳамда Ромитан ихтисослаштирилган прокуратураси томонидан “Ногиронлиги бўлган шахслар ҳуқуқлари ва прокурор назорати” номли илмий рисола тайёрланди ва нашр этилди.

Ушбу илмий рисола ногиронлиги бўлган шахсларнинг ҳуқуқий мақомининг ўзига хос жиҳатлари, халқаро стандартлар ва миллий қонунчилик нормалари асосида уларнинг ҳуқуқларини таъминлаш масалаларига бағишланган. Рисолада ногиронлиги бўлган шахсларнинг ҳуқуқларини ҳимоя қилиш бўйича сўнгги йиллардаги халқаро ва миллий тенденциялар таҳлил қилинган, айниқса, прокурор назоратининг ролини кучайтириш ва такомиллаштириш масалаларига алоҳида эътибор қаратилган.

Дарҳақиқат, дунёқарашда инсон омили устувор аҳамият касб этаётган бугунги кунда ногиронлиги бўлган шахсларнинг жамиятга мослашуви, бандлиги, таълим олиши ва ҳуқуқларини ҳимоя қилиш соҳасида янги ёндашувлар талаб этилмоқда. Бу эса прокурор назоратининг аҳамиятини янада оширишни тақозо этади. Илмий рисолада айнан шу йўналишдаги замонавий механизмлар ва халқаро тажриба атрофлича таҳлил этилган.

Муаллифлар томонидан ногиронлиги бўлган шахсларнинг ҳуқуқларини таъминлаш соҳасидаги миллий қонунчилик (жумладан, "Ногиронлиги бўлган шахсларнинг ҳуқуқларини ҳимоя қилиш тўғрисида"ги Қонун ва Ногиронлар ҳуқуқлари тўғрисидаги конвенция) ва амалиёт танқидий ўрганилган ҳамда қиёсий таҳлил орқали илмий асосланган таклиф ва тавсиялар илгари сурилган. Нашрда прокурор назоратининг ташкилий-ҳуқуқий асосларини такомиллаштириш бўйича ҳам амалий таклифлар берилган.

Шунингдек, рисоланинг якуний қисмларида ногиронлиги бўлган шахсларнинг ҳуқуқларига оид асосий норматив-ҳуқуқий ҳужжатлардан муҳим кўчирмалар ва улар учун амалда белгиланган имтиёзлар рўйхати ҳам келтирилган.

Ушбу нашр профессор-ўқитувчилар, докторантлар, мустақил изланувчилар, юридик соҳада таҳсил олаётган талабалар (курсантлар ва тингловчилар), прокуратура органлари ходимлари, судьялар, адвокатлар, инсон ҳуқуқлари ва прокурор назорати муаммоларига қизиқувчи кенг китобхонлар оммаси учун мўлжалланган.