Тошкент вилоятида сайёр ўқув ва амалий машғулотлар ўтказилди

Академия бошлиғининг биринчи ўринбосари Е.В.Коленко бошчилигидаги ишчи гуруҳ томонидан вилоятларга чиққан ҳолда энергия самарадорлигини оширишга оид қонунчилик ижроси назорат самарадорлигини ошириш, маиший коррупциянинг олдини олиш, жиноятчиликни жиловлаш ҳамда кибержиноятчиликка қарши курашиш мавзулари юзасидан сайёр ўқув ва амалий машғулотларини ўтказиш давом эттирилмоқда.

Навбатдаги сайёр ўқув ва амалий машғулотлар Тошкент вилояти прокуратураси ва вилоят ички ишлар бош бошқармасида ташкил этилди.

Хусусан, вилоят прокуратурасида маҳкама раҳбарияти ва ходимлари, туман (шаҳар) прокурорлари ва уларнинг соҳага масъул бўлган ёрдамчилари иштирокида “Энергия ресурсларидан фойдаланиш ва сарфланишига оид қонунчилик ижроси устидан прокурор назорати” мавзусида ўқув семинари ўтказилди.

Ўқув машғулотида энергия ресурсларидан фойдаланиш ва сарфланишига оид қонунчилик ижроси устидан прокурор назоратини таъминлаш бўйича норматив ҳужжатлар ва соҳавий буйруқларда белгиланган вазифалар, назорат тадбирларида эътибор қаратилиши лозим бўлган масалалар ёритиб берилди.

Шунингдек, ўқув машғулотлари Тошкент вилояти Ички ишлар бош бошқармасида давом эттирилиб, унда вилоят прокуратураси ва ички ишлар бош бошқармасининг тергов устидан назоратни амалга оширувчи тармоқлар ва тергов бўлинмалари прокурор-терговчилари, туман прокурорлари ва уларнинг ўринбосарлари, прокуратура ва ички ишлар бўлинмалари терговчилари қатнашди.

Иштирокчиларга Ўзбекистон Республикаси Президентининг 2025 йил 30 апрелдаги “Ахборот технологиялари ёрдамида содир этиладиган жиноятларга қарши курашиш фаолиятини янада кучайтиришга қаратилган чора-тадбирлар тўғрисида”ги 153-сонли қарори мазмун-моҳияти, шунингдек “Ахборот технологиялари ёрдамида содир этилган жиноятчилик аҳволи, амалиётдаги муаммолар, бу тоифадаги жиноятларни фош этиш ва тергов қилиш самарадорлигини ошириш” мавзусида машғулот ўтказилди.

Тадбир давомида давлатимиз Раҳбари томонидан қабул қилинган сўнгги қарорнинг мазмун-моҳияти атрофлича ёритиб берилди, Академиянинг Рақамли криминалистика илмий-тадқиқот институтининг имкониятлари, терговчилар ва уларни назорат қилувчи прокурорлар учун кибержиноятларни фош этиш ҳамда тергов қилишда ўтказилиши мумкин бўлган экспертиза турлари ҳақида тушунтириш берилди. Академия томонидан тайёрланган “Ахборот технологиялари соҳасидаги жиноят ишларини юритишда терговчининг ён дафтари” услубий қўлланмаси тақдимоти ўтказилди.

Навбатдаги ўқув ва амалий машғулоти “Коррупциянинг олдини олиш, унга қарши курашиш, шу жумладан, маиший коррупцияга барҳам бериш” мавзусидаги тақдимот қилиниб, кундалик ҳаётда содир этилаётган маиший коррупция ҳуқуқбузарликлари ва жиноятлари, уларнинг олдини олишнинг самарали усуллари ҳақида иштирокчиларга батафсил ёритиб берилди.

Туркум тадбирлар доирасида шунингдек “Маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини ошириш” мавзусидаги ўқув машғулотида иштирокчиларга жиноятчиликни олдини олиш бўйича ўтказиладиган кунлик ва бошқа муддатли тадбирлар юзасидан йўл қўйилаётган камчиликлар, уларни бартараф этиш ва ишни самарали ташкил этиш бўйича амалий мисоллар ёрдамида тушунтириб берилди.

Академия томонидан юқоридаги долзарб мавзуларда ўқув ва амалий машғулотлар давом эттирилмоқда.