Ўзбекистон Республикаси Бош прокуратураси Академияси ташкил этилганлигининг икки йиллигига бағишланган халқаро илмий-амалий онлайн конференция

Ижтимоий-иқтисодий ривожланишнинг янги устувор йўналишлари ва қонун устуворлигини таъминлашдаги вазифалар, ҳуқуқни муҳофаза қилиш соҳасидаги кадрларнинг салоҳиятини энг яхши, замонавий инновацион ёндашув ва амалиёт асосида янада ривожлантирилишини талаб қилади.

Эришилган ютуқлар ва илғор таълим услубиётларини жорий этиш натижаларини муҳокама қилиш, тажриба алмашиш ҳамда ҳуқуқни муҳофаза қилиш соҳаси мутахассисларини ўқитиш жараёнини замонавий муаммоларни инобатга олган ҳолда янада такомиллаштириш юзасидан таклифлар ишлаб чиқиш мақсадида Бош прокуратура Академияси томонидан жорий йилнинг 27 май куни “Ҳуқуқни муҳофаза қилиш соҳасидаги таълим салоҳиятини ошириш: муаммо ва ечимлар” мавзусидаги халқаро илмий-амалий онлайн конференция ўтказилди.

Тадбир Ўзбекистон Республикаси Президентининг 2018 йил 8 майдаги ПФ–5438-сонли Фармонига мувофиқ Бош прокуратура Академияси ташкил этилганининг икки йиллиги ҳамда шу давр мобайнида амалга оширилган ишлар сарҳисобига бағишланган бўлиб, Инсон ҳуқуқлари бўйича Ўзбекистон Республикаси Миллий маркази, БМТнинг Наркотик моддалар ва жиноятчилик бўйича бошқармаси, ЕХҲТнинг Ўзбекистондаги лойиҳалари мувофиқлаштирувчиси, «Минтақавий мулоқот» ХННТ ваколатхонаси кўмагида ташкил этилди.

Анжуман ялпи ва тематик сессиялар шаклида ташкиллаштирилиб, унда замонавий босқичда пандемия шароитида таълим жараёнини ташкил этиш масалалари, таълим сифатини бошқариш, юридик фан ва маорифнинг коррупцияга қарши курашишдаги ўрни ва аҳамияти, жиноий даромадларни легаллаштиришга оид ҳамда мураккаб молиявий жиноятларни тергов қилиш салоҳиятини такомиллаштириш масалалари муҳокама қилинди.

Сессияларда илм-фан ва таълим соҳасидаги 170 дан зиёд хорижий ва миллий экспертлар, шунингдек 24 давлат ва 10 халқаро ташкилот, жумладан БМТ агентликлари, Жиноий даромадларни легаллаштириш ва терроризмни молиялаштиришга қарши курашиш Евросиё гуруҳи котибияти, Халқаро антикоррупция академияси, Жиноий даромадларни легаллаштириш ва терроризмни молиялаштиришга қарши курашиш бўйича халқаро тармоқ институти, Молиявий мониторинг бўйича халқаро ўқув-методик марказининг халқаро департаменти амалиётчилари иштирок этишди.

Тадбирни кириш сўзи билан очган Ўзбекистон Республикаси Бош прокурори ўринбосари Э.Т.Юлдашев ҳамда Ўзбекистон Республикаси Олий Мажлиси Қонунчилик палатаси Спикерининг биринчи ўрибосари, Инсон ҳуқуқлари бўйича Ўзбекистон Республикаси Миллий маркази директори, Ўзбекистон фанлар академияси ҳақиқий аъзоси, академик, юридик фанлар доктори, профессор, А.Х.Саидов Академия томонидан қисқа давр ичида эришилган ижобий натижаларда тўхталиб ўтдилар.

Конференцияни ташкил этишда яқиндан ҳамкорлик қилган БМТнинг Наркотик моддалар ва жиноятчилик бўйича бошқармаси минтақавий вакили Ашита Миттал, ЕХҲТнинг Ўзбекистондаги лойиҳалари мувофиқлаштирувчиси, Элчи Джон МакГрегор, “Минтақавий мулоқот” ХННТ ваколатхонаси раҳбари Мьюша Север Академия жамоасини қутлаб, трасмиллий уюшган жиноятчилик ва коррупцияга қарши курашиш, одил судлов соҳасидаги ислоҳотлар, ҳуқуқбузарликлар профилактикаси, Барқарор ривожланиш мақсадларига эришиш ва бошқа муҳим йўналишларда ҳамкорликдаги лойиҳаларни амалга оширишни келгусида давом эттиришга тайёрликларини билдирдилар.

Ҳамкорлар Академиянинг касбий юридик таълимни ривожлантириш, инновацион таълим ва рақамли технологияларни жорий этиш, фан ва таълимнинг юқори сифат стандартларига эришиш борасидаги ташаббусларини қўллаб қувватлаш мақсадида эканликларини таъкидлашди.

Конференцияда Халқаро антикоррупция академияси (IAKA) директори Т.Штельзер, Жиноий даромадларни легаллаштириш ва терроризмни молиялаштиришга қарши курашиш бўйича халқаро тармоқ институти раҳбари В.Овчинников, Халқаро антикоррупция академияси фахрий ижрочи директори М.Кройтнер, Озарбайжон респуликаси Бош прокуратураси Илмий-таълим маркази бошлиғи Н.Байрамов, Арманистон Республикаси Адлия академияси ректори ўринбосари А.Манасян, Қозоғистон Республикаси Президенти ҳузуридаги Давлат бошқаруви академияси коррупцияга қарши курашиш тадқиқот маркази раҳбари Ж.Рысбекова, Кембриж университети Марказий Осиё форуми директори, доктор С.Саксена, Россия Федерацияси Олий иқтисодиёт мактаби коррупцияга қарши курашиш маркази директори А.Конов, Россия Федерацияси Тергов қўмитаси Санкт-Петербург академияси малака ошириш институти директори Т.Розовская ва бошқа илмий-таълим муассасалари раҳбар ва ходимлари маъруза билан иштирок этдилар.

Ўтказилган ялпи йиғилиш ва тематик сессиялар натижаларига кўра, конференциянинг ҳуқуқни муҳофаза қилиш соҳасидаги илмий ва таълим салоҳиятини ошириш, идоралараро ва халқаро ҳамкорликни мустаҳкамлашга қаратилган амалий тавсиялари қабул қилинди.