Самарқанд вилояти прокуратураси ва ички ишлар органлари ходимлари учун сайёр ўқув ва амалий машғулотлар ташкил этилди

Академия бошлиғининг биринчи ўринбосари Е.В.Коленко бошчилигидаги ишчи гуруҳ томонидан вилоятларга чиққан ҳолда жиноятчиликни жиловлаш, кибержиноятчиликка қарши курашиш, маиший коррупциянинг олдини олиш ҳамда энергия самарадорлигини оширишга оид қонунчилик ижроси назорат самарадорлигини ошириш мавзуларида навбатдаги сайёр ўқув ва амалий машғулотлари Самарқанд вилоятида ташкил этилди.

Хусусан, аралаш шаклда ўтказилган тадбирларда Самарқанд вилоят прокуратурасида қайд этилган соҳага масъул бўлган маҳкама раҳбарияти ва ходимлари, туман прокурорлари ва уларнинг ўринбосарлари, ёрдамчилари, шунингдек вилоят ва туман даражасидаги ички ишлар органлари терговчилари иштирок этишди.

Иштирокчиларга “Ахборот технологиялари ёрдамида содир этилган жиноятчилик аҳволи, амалиётдаги муаммолар, бу тоифадаги жиноятларни фош этиш ва тергов қилиш самарадорлигини ошириш” мавзуси доирасида Академиянинг Рақамли криминалистика илмий-тадқиқот институтининг имкониятлари ёритилиб, терговчилар ва уларни назорат қилувчи прокурорлар учун кибержиноятларни фош этиш ҳамда тергов қилишда ўтказилиши мумкин бўлган экспертиза турлари, Академияда тайёрланган “Ахборот технологиялари соҳасидаги жиноят ишларини юритишда терговчининг ён дафтари” услубий қўлланмадан фойдаланиш қоидалари ҳақида тушунтириш берилди.  

Навбатдаги ўқув-амалий машғулоти “Маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини ошириш” мавзусида ўтказилиб, унда жиноятчиликни олдини олиш бўйича ўтказиладиган кунлик ва бошқа муддатли тадбирлар юзасидан йўл қўйилаётган камчиликлар, уларни бартараф этиш ва ишни самарали ташкил этиш бўйича амалий мисоллар ёрдамида тушунтириб берилди, шунингдек тергов сифатини ошириш юзасидан тегишли тавсиялар билдирилди.

Ўқув машғулоти “Коррупциянинг олдини олиш, шу жумладан маиший коррупцияга барҳам бериш” мавзусида давом эттирилиб, ходимларга кундалик ҳаётда содир этилаётган маиший ва маъмурий коррупцияга оид жиноятлар, уларнинг олдини олиш бўйича кунлик назорат тадбирларини ўтказиш бўйича батафсил тақдимот ўтказилди.

Тадбир якуний қисмида иштирокчиларга ташкил этилган “Энергия ресурсларидан фойдаланиш ва сарфланишига оид қонунчилик ижроси устидан прокурор назорати” мавзусидаги ўқув-амалий машғулотида энергия ресурсларидан фойдаланиш ва сарфланишига оид қонунчилик ижроси устидан прокурор назоратини таъминлаш бўйича норматив ҳужжатлар ва соҳавий буйруқларда белгиланган вазифалар, назорат тадбирларида эътибор қаратилиши лозим бўлган масалалар ёритиб берилди.

Академия томонидан жойларга чиққан ҳолда ўқув ва амалий машғулотлари ўтказиш давом эттирилади.