“Юридик фан ва ҳуқуқни қўллаш амалиётининг долзарб масалалари” мавзусида халқаро илмий-амалий конференция ўтказилди

Ҳуқуқни муҳофаза қилиш академияси томонидан “Юридик фан ва ҳуқуқни қўллаш амалиётининг долзарб масалалари” мавзусида халқаро илмий-амалий конференция ташкил этилди.

Конференциянинг асосий мақсади сифатида илмий салоҳиятга ва креатив ёндашувга эга бўлган юридик фанлар соҳасига доир замонавий ғоя ва таклифларни тақдим этиш ҳамда юридик фаннинг устувор йўналишлари бўйича миллий олимларимиз ва ёш изланувчиларимиз тадқиқотларининг ҳозирги тенденциялари ва натижаларини муҳокама қилишга бағишланди.

Конференцияда Академиянинг профессор-ўқитувчилари, Ўзбекистон Республикаси Бош прокуратураси, Олий суд, Инсон ҳуқуқлари бўйича Ўзбекистон Республикаси Миллий маркази, Судьялар олий кенгаши ҳузуридаги Судьялар олий мактаби, Ўзбекистон Республикаси Фавқулодда вазиятлар вазирлиги академияси, Тошкент давлат юридик университети, Ички ишлар вазирлиги академияси, Жамоат хавфсизлиги университети, Юридик кадрларни қайта тайёрлаш ва малакасини ошириш институти вакиллари, Ҳуқуқни муҳофаза қилиш академиясининг мустақил изланувчилари, таянч докторантлари, магистратура тингловчилари ва бакалавриат талабалари иштирок этишди.

Тадбирда миллий маърузачилардан ташқари, Россия Федерацияси Тергов қўмитасининг Санкт-Петербург академияси, Беларусь Республикасининг Янка Купала номидаги Гродно давлат университети ҳамда Қозоғистон Республикаси Академияси ҳузуридаги Касбий тайёргарлик институти олимлари ҳамда тадқиқотчилари маърузалар қилишди.

Конференцияда юридик фанни такомиллаштиришда замонавий ахборот-коммуникация технологиялари ҳамда сунъий интеллектдан фойдаланишнинг афзалликлари, ҳуқуқни қўллаш амалиётида илғор хориж тажрибасини ўрганишнинг ролига доир масалалар таҳлили ҳамда ҳозирги кунда назария ва амалиётда мавжуд ҳуқуқий бўшлиқлар, шу билан биргаликда эришилаётган ютуқлар ҳамда қонунчилик ҳужжатларини такомиллаштиришга оид илгари сурилган таклифлар конференция ишини жонли руҳда ўтишига хизмат қилди.

Шунингдек, конференцияда қатнашган ёш тадқиқотчилар ҳам соҳанинг етук мутахассисларидан ўзларини қизиқтирган саволларга жавоблар олишди ва конференция иши илмий баҳс-мунозара шаклида олиб борилди.

Халқаро илмий-амалий конференция якунида иштирокчилар томонидан келгусида юридик фаннинг барча тармоқларини ривожлантиришда ҳамда ҳуқуқни қўллаш амалиётидаги масалалар бўйича ўзаро манфаатли ҳамкорликни амалга ошириш, илмий-амалий тажриба алмашишга келишиб олинди ва иштирокчиларга конференция натижаси ўлароқ чоп этиладиган материаллар тўпламига ўз илмий мақола ва тезисларини тақдим этишлари мумкинлиги  маълум қилинди.