Жиноий активларни қайтариш масалалари бўйича ARIN тармоқларининг навбатдаги йиғилиши бўлиб ўтди

Ўзбекистон Республикаси Ҳуқуқни муҳофаза қилиш академияси вакили Ғарбий ва Марказий Осиё давлатларининг активларни қайтариш бўйича ноформал тармоғи (ARIN-WCA) доимий Котибиятининг вазифаларини амалга ошириши доирасида CARIN тармоғи Котибияти (Европол) томонидан ташкиллаштирилган жиноий активларни қайтариш бўйича ноформал тармоқларнинг (ARIN) котибиятлари ва раислик қилувчи давлатлари вакилларининг 11-учрашувида иштирок этди.

Учрашувда ҳозирги кунда фаолият юритаётган барча мажуд ARIN тармоқлари (CARIN, ARIN-AP, ARIN-CARIB, ARIN-EA, ARINSA, RRAG, ARIN-WCA, MENA-ARIN, ARIN-CA), котибиятлари ва раислик қилувчи давлатлари, шунингдек Европол ташкилотининг молиявий разведка соҳасида давлат хусусий ҳамкорлик тармоғи (EFIPP), Европа молиявий ва иқтисодий жиноятлар маркази (EFECC), Активларни қайтариш лойиҳаси (АР), Терроризмга қарши курашиш маркази (TFTP), Европа Комиссияси, Европа прокуратураси (EPPO), Буюк Британия Жиноятларга қарши курашиш миллий агентлиги (NCA), Латвия активларни қайтариш офиси, Халқаро ҳамкорлик бўйича Германия жамияти (GIZ) фонди вакиллари ҳамда масъул ходимлари қатнашишди.

Тадбир иштирокчилари уюшган жиноятчиликка қарши курашишнинг асосий таркиби сифатида жиноий активларни қайтариш бўйича ноформал тармоқларнинг ўрни ва аҳамиятини эътироф этишиб, ушбу тармоқларнинг самарадорлигини янада ошириш, давлатларнинг активларни қайтариш соҳасидаги ноформал алоқаларининг муҳимлилиги, самарали ҳамкорликни амалга ошириш ва мавжуд муаммоларни биргаликда бартараф этиш мақсадида иштирок этувчи давлатлар доирасини кенгайтириш, асосий вазифа ва йўналишларни белгилаш, профессионал алоқаларни ўрнатиш ва уларни янада чуқурлаштириш, мазкур соҳадаги янги билим ва тажрибалар билан алмашиш каби масалаларни муҳокама қилишди.

Учрашувда ARIN-WCA тармоғининг янги ташкил этилган ARIN-СA (Марказий Африка давлатлари) ва MENA-ARIN (Яқин Шарқ ва Шимолий Африка давлатлари) тармоқларига кузатувчи сифатида қўшилиш масаласини кўриб чиқиш таклифи билдирилди. Бу эса ўз навбатида ARIN-WCA аъзоларининг Яқин Шарқ, Марказий Африка ва Шимолий Африка давлатлари юрисдикциялари билан ҳамкорлик географиясини кенгайтириш учун хизмат қилади.

Учрашув якунлари бўйича иштирокчилар томонидан келгусида муҳокама қилинадиган муҳим масалалар белгилаб олинди, фаол ҳамкорлик қилиш ва ARIN доирасида алоқаларни янада мустаҳкамлашга тайёр эканликлари билдирилди.