Халқаро илмий-амалий конференциянинг давоми Самарқандда: кибержиноятларни тергов қилиш масалалари муҳокама қилинди

2025 йил 20 июнь куни Ўзбекистон Республикаси Ҳуқуқни муҳофаза қилиш академияси ташаббуси билан ташкил этилган “Рақамли трансформация даврида ҳуқуқни муҳофаза қилиш фаолиятидаги замонавий чақириқлар ва таҳдидлар” мавзусидаги халқаро илмий-амалий конференциянинг иккинчи куни доирасида Самарқанд шаҳрида “Кибержиноятларни тергов қилишнинг долзарб масалалари ва илғор тажриба” мавзусида халқаро давра суҳбати бўлиб ўтди.

Тадбирда Ўзбекистон Республикаси Бош прокуратураси, Ички ишлар вазирлиги, Давлат хавфсизлик хизмати, Марказий банк, шунингдек ЕХҲТ, БМТнинг Гиёҳвандлик ва жиноятчилик бўйича бошқармаси, АҚШ Адлия вазирлиги ҳузуридаги гиёҳванд моддаларга қарши кураш федерал агентлиги, Россия Федерацияси ва Беларусь Республикаси Тергов қўмиталари, Испания Қироллиги Фуқаролик гвардияси, Корея Республикаси прокуратураси, Тожикистон Республикаси Бош прокуратураси, Беларусь Республикаси Суд экспертизаси давлат қўмитаси, BOOKing.com компанияси ва бошқа халқаро ташкилотлар вакиллари иштирок этдилар.

Давра суҳбати кун тартибида қуйидаги муҳим масалалар муҳокама қилинди:

• Беларусь Республикаси мисолида кибержиноятларни тергов қилиш бўйича илғор хорижий тажриба;
• АҚШда крипто-активлар ноқонуний муомаласи бўйича тергов ишлари хусусиятлари;
• Киберфирибгарликда ижтимоий муҳандислик усулларидан фойдаланиш механизмлари;
• Фуқароларнинг ҳуқуқий маданияти ва рақамли саводхонлигини ошириш;
• Рақамли далилларни йиғиш методологияси;
• Кибержиноятчиликка қарши кураш соҳасида кадрлар тайёрлаш масалалари;
• Ўзбекистон Республикаси Марказий банкининг кибер таҳдидларни мониторинг қилиш ва олдини олишдаги ўрни.

Икки кун давом этган халқаро илмий-амалий конференция иштирокчиларга илғор тажриба ва фикрлар алмашиш, амалий таклиф ва тавсиялар ишлаб чиқиш имконини яратди. Бу, ўз навбатида, кибержиноятларни самарали тергов қилиш борасида халқаро ҳамкорликни кучайтиришга хизмат қилади.

Таъкидлаш лозимки, Ўзбекистон тажрибаси, хусусан Академия ҳузуридаги Рақамли криминалистика илмий-тадқиқот институти фаолияти халқаро ҳамкорлар томонидан катта қизиқиш ва эътирофга сазовор бўлди.

Ўзбекистон республикаси Ҳуқуқни муҳофаза қилиш академияси қонунийлик ва рақамли хавфсизликни таъминлаш соҳасида инновацион ёндашувларни жорий этиш, профессионал мулоқот муҳитини шакллантириш ва жаҳон миқёсидаги экспертлик платформасини мустаҳкамлаш анъанасини давом эттиради.

Тадбир якунлари бўйича халқаро конференция материаллари тўплами нашр этилади.