Жиноий даромадларни легаллаштиришга қарши курашиш соҳасида халқаро ўқув дастурида иштирок этилди

Академия ходими Япония Халқаро ҳамкорлик агентлиги (JICA) ҳамда БМТнинг Жиноятларнинг олдини олиш ва жиноятчиларни қайта тарбиялаш бўйича Осиё ва Шарқий Осиё институти (UNAFEI) ҳамкорлигида ташкил этилган “Жиноий одил судлов (Тергов, айблов, суд муҳокамаси ва халқаро ҳамкорликка эътибор қаратилган ҳолда)” халқаро дастури доирасида “Жиноий даромадларни легаллаштиришга қарши курашишдаги долзарб муаммолар, самарали чора-тадбирлар” ўқув курсида иштирок этди.

Тадбирда Япония, Бутан, Мальдив, Лаос, Покистон, Сьерра-Леоне, Эфиопия, Жанубий Судан, Вьетнам, Замбия ва Ўзбекистон давлатларининг суд, прокуратура, ҳуқуқни муҳофаза қилувчи органлар ходимлари ҳамда юридик тадқиқотчилар қатнашди.

Курс доирасида Япония, АҚШ, Таиланд, Бутан, Мальдив, Лаос, Покистон, Сьерра Леоне, Эфиопия, Жанубий Судан, Вьетнам ва Замбия давлатларининг ҳамда FATFнинг тавсиялари ўрганилди.

Шунингдек, пул ювишнинг замонавий усул ва воситалари, Японияда жиноий даромадларни легаллаштириш ва терроризмни молиялаштиришга қарши чораларнинг ҳозирги ҳолати ва муаммолари, молиявий разведкани ташкил этиш, крипто-активларнинг ноқонуний муомаласи, уларни аниқлашда қўлланиладиган усул ва воситалари, пул ювиш ва терроризмни молиялаштиришнинг глобал тенденциялари, пул ювиш ҳолатларини мониторинг қилиш ва аниқлаш, трансчегаравий пул ювиш ҳолатларини тергов қилиш, криптоактивлардан фойдаланган ҳолда пул ювишга оид жиноий ишлар бўйича процессуал чораларни ташкил этиш каби масалалар ўрганилди ҳамда фикр алмашилди.

Академия ходими томонидан “Ўзбекистонда жиноий даромадларни легаллаштиришга қарши курашиш ҳамда самарали қарши чоралар” мавзусида маъруза билан тақдимот ўтказилди.

Япония Адлия вазирлиги (MOJJ), Олий прокуратураси ҳузуридаги Янги пайдо бўлаётган жиноятлар бўйича прокурорлар бошқармаси (JPEC) га ташриф буюрилиб, фаолияти ҳамда Ҳуқуқий тарих материаллари кўргазма зали экспонатлари билан танишилди, шунингдек Токио шаҳар судининг Тачикава провинцияси судига ташриф буюрилиб, суд процессида кузатувчи сифатида иштирок этилди.