Халқаро ҳамкорлик янги босқичга чиқмоқда: Академия томонидан муҳим келишувлар имзоланди

Ўзбекистон Республикаси Ҳуқуқни муҳофаза қилиш академияси халқаро академик ҳамкорликни кенгайтириш борасида изчил ишларни давом эттирмоқда.

«Рақамли трансформация даврида ҳуқуқни муҳофаза қилиш фаолиятидаги замонавий чақириқ ва таҳдидлар» мавзусидаги халқаро илмий-амалий конференция доирасида Академия томонидан етакчи хорижий олий таълим муассасалари билан янги ҳамкорлик келишувлари имзоланди ҳамда ўзаро ҳамкорликнинг устувор йўналишлари белгилаб олинди.

Эътибор марказида – рақамли даврнинг замонавий чақириқлари ва ҳуқуқни муҳофаза қилиш соҳасида халқаро ҳамкорликни мустаҳкамлаш масалалари турди.

Халқаро иштирокнинг кўлами Академиянинг глобал ҳуқуқий мулоқот майдони сифатидаги юксак нуфузини яна бир бор тасдиқлади: тадбирда АҚШ, Бельгия, Беларусь, Бирлашган Араб Амирликлари, Буюк Британия, Канада, Корея, Латвия, Люксембург, Сингапур, Озарбайжон, Испания, Покистон, Польша, Португалия, Россия, Руминия, Словения, Таиланд, Тожикистон, Туркия, Франция, Чехия, Хитой, Швеция, Қирғизистон, Қатар, Қозоғистон ва Япония каби 30 мамлакатдан 120 нафарга яқин эксперт ва соҳавий ташкилотлар вакиллари иштирок этди.

Конференция доирасида бир қатор хорижий таълим муассасалари раҳбарлари билан икки томонлама учрашувлар ўтказилди. Жумладан, Россия Федерацияси Прокуратура университети ректори И.Мацкевич, Туркия Адолат академияси президенти Б.Алтун, Тожикистон Республикаси прокуратура органлари ходимлари малакасини ошириш институти директори ўринбосари К.Баракатулло ва Н.И.Лобачевский номидаги Нижний Новгород Миллий тадқиқот университети халқаро фаолият ва ташқи алоқалар бўйича проректори А.Бедний билан ҳамкорлик масалалари муҳокама қилинди.

Шунингдек, Академия ва Россия Федерацияси Прокуратура университети ўртасида 2025–2026 йилларга мўлжалланган ҳамкорлик дастури ҳамда Н.И.Лобачевский номидаги Миллий тадқиқот университети билан ҳамкорлик тўғрисидаги келишувлар имзоланди.

Музокаралар давомида томонлар ўзаро ҳамкорликнинг юксак даражасини қайд этиб, икки томонлама муносабатларни янада чуқурлаштиришнинг устувор йўналишларини белгилаб олдилар.